: धादिङको गल्छी गाउँपालिकामा निर्माण सम्पन्न भइसकेको बैरेनी अस्पतालको नयाँ भवन अझै सञ्चालनमा आउन सकेको छैन। भवन तयार भइसके पनि सेवा सुरु हुन नसक्दा स्थानीयस्तरमा विभिन्न प्रश्न उठ्न थालेका छन् । जनप्रतिनिधिबीचको असमझदारी, कर्मचारीबीचको आन्तरिक विवाद तथा निर्माण प्रक्रियामा देखिएका केही ढिलाइका कारण सेवा सञ्चालनमा समय लागेको स्थानीयले बताएका छन् ।
२०७७ साल मंसिर १५ गते १८ करोड ८७ लाख रुपैयाँ लागतमा निर्माण हुने १० शैंयाको अस्पताल भवनको शिलान्यास गरिएको थियो । संघीय सरकारको पहल र गाउँपालिकाको लगानीमा निर्माण गरिएको उक्त भवन अहिले पूर्ण रूपमा तयार भइसकेको छ । आवश्यक भौतिक संरचना तयार रहेको र चिकित्सक समेत उपलब्ध रहेको बताइए पनि नयाँ भवनबाट उपचार सेवा भने अझै सुरु हुन सकेको छैन ।
अस्पताल सञ्चालनमा ढिलाइ हुँदा स्थानीय नागरिक भने अझै पनि नजिकैको पुरानो र साँघुरो हेल्थ पोस्ट भवनबाट सीमित स्वास्थ्य सेवा लिन बाध्य छन् । यो अस्पताल गल्छी गाउँपालिकाको मातहतमा रहने र सञ्चालनको जिम्मेवारी पनि गाउँपालिकाकै हुने बताइएको छ । स्थानीय तहले आवश्यक जनशक्ति, उपकरण र व्यवस्थापन मिलाएर अस्पताल सञ्चालन गर्ने तयारी गरिरहेको जनाएको छ ।
यस विषयमा अहिले स्थानीय तहमा जवाफदेहिताको प्रश्न समेत उठ्न थालेको छ । स्थानीय बासिन्दाले करोडौँ रुपैयाँ लागतमा बनेको अस्पताल भवन लामो समयसम्म सञ्चालनमा नआउनु दुःखद भएको भन्दै यथाशीघ्र सेवा सुरु गर्न माग गरेका छन् ।
गल्छी गाउँपालिका–६ का वडाध्यक्ष दीपक कार्कीका अनुसार अस्पताल सञ्चालनका लागि आवश्यक केही प्राविधिक काम तथा व्यवस्थापनका तयारी पूरा गर्ने क्रममा समय लागेको हो । उनले अब छिट्टै सेवा सुरु गर्ने तयारी भइरहेको र आगामी चैत मसान्तभित्र नयाँ भवनबाट अस्पताल सञ्चालनमा ल्याउने लक्ष्य रहेको बताए ।
