: साउथर्न लेबनानस्थित नेपाली शान्ति सेनाको हेड क्वार्टरमा आक्रमण भएको छ । शुक्रबार बेलुका इजरायल सीमा नजिकको नेपाली शान्ति सेनाको बटालियन हेड क्वार्टरको भवन (घर) मा आक्रमण भए पनि कुनै मानवीय क्षति नभएको नेपाली सेनाका प्रवक्ता राजाराम बस्नेतले जानकारी दिए ।
इरान–इजरायल–अमेरिका युद्धको वर्तमान अवस्थामा नेपाली सेनाको टोली बंकरभित्र बसिरहेको समयमा आक्रमण भएका कारण सबै नेपाली शान्ति सेना सुरक्षित र सकुशल रहेको पनि प्रवक्ता बस्नेतले बताए । कताबाट के आएर भवनमा लाग्यो भन्ने यकिन भइनसकेको बताउँदै प्रवक्ता बस्नेतले घटनाका बारेमा संयुक्त राष्ट्र संघले छानविन गर्ने समेत बताए । उनले भवनमा भने क्षति पुगेको बताएका छन् ।
शान्ति सेनामा रहने टोली अदलबदल भइरहने भएका कारण यति नै संख्यामा नेपाली शान्ति सेना थिए भनेर भन्न नसकिने प्रवक्ता बस्नेतले बताए । उनले नेपाली शान्ति सेना सीमा क्षेत्रका विभिन्न पोष्टहरुमा खटिने गरेको समेत जानकारी दिएका छन् । दुई हप्ता बढी समयदेखि जारी इरान, इजरायल–अमेरिका युद्धका कारण मध्य पूर्वी देशहरुमा तनाव बढिरहेको छ ।
