: अमेरिका र इरानबीचको तनाव चरम सीमामा पुगेका बेला अमेरिकी सरकारले इरानी सैन्य कमाण्डर र उच्चपदस्थ नेताहरूको सूचना दिनेलाई पुरस्कारकाे घोषणा गरेको छ। अमेरिकाले इरानको 'इस्लामिक रिभोलुसनरी गार्ड कर्प्स'का मुख्य नेताहरूको बारेमा जानकारी दिने जो कोहीलाई १ करोड अमेरिकी डलर (करिब १ अर्ब ३३ करोड नेपाली रुपैयाँ) सम्मको पुरस्कार दिने घोषणा गरेको हो।
अमेरिकी विदेश मन्त्रालयद्वारा जारी गरिएको सूचनामा कुल १० जनाको नाम उल्लेख गरिएको छ। जसमध्ये ६ जनाको नाम र तस्बिर सार्वजनिक गरिएको छ। यस सूचीमा सबैभन्दा ठूलो नाम इरानका नयाँ सर्वोच्च नेता मोजतबा खामेनी को रहेको छ। सूचीमा रहेका अन्य प्रमुख व्यक्तिहरूमा सर्वोच्च राष्ट्रिय सुरक्षा परिषद्का सचिव अली लारीजानी पनि रहेका छन् । लारी केही दिनअघि इरानमा भएको अमेरिकाविरोधी प्रदर्शनमा देखिएका थिए । त्यस्तै, मेजर जनरल रहिम सफावी, अलि अस्गर हेजाजी र अन्य सैन्य कमाण्डरहरू सहित कुल १० जनालाई अमेरिकाले आफ्नो मुख्य निसानामा राखेको छ।
यसअघि अमेरिकाले इरानका सर्वोच्च नेता आयातुल्ला अली खामेनी को हत्या गरेपछि दुई देशबीच युद्धको जारी छ। अमेरिकाले अहिले पनि बाँकी रहेका प्रमुख इरानी नेताहरूको खोजी र उनीहरूमाथि कारबाही गर्ने प्रयासलाई तीव्रता दिइरहेको छ।
अमेरिकाको दाबी अनुसार यी नेताहरूले इस्लामिक रिभोलुसनरी गार्ड कर्प्स मार्फत विश्वभर आतंकवादी गतिविधि सञ्चालन गर्ने र अमेरिकी सैन्य आधार इलाकामा आक्रमण गर्ने योजना बुन्दै आएका छन्। इरानले भने अमेरिकी कदमलाई 'अन्तर्राष्ट्रिय अपराध' भन्दै कडा प्रतिवाद गर्ने चेतावनी दिएको छ।
