: फ्रान्सका राष्ट्रपति इमानुएल म्याक्रोँले इजरायललाई लेबनानसँग प्रत्यक्ष वार्ता गर्न आग्रह गर्दै पेरिसमा युद्धविरामको छलफल आयोजना गर्ने प्रस्ताव राखेका छन् ।
राष्ट्रपति म्याक्रोँले सामाजिक सञ्जाल एक्समार्फत आफूले लेबनानका राष्ट्रपति जोसेफ औन, प्रधानमन्त्री नवाफ सलाम र संसदका सभामुख नबिह बेरीसँग कुराकानी गरेको जानकारी दिएका हुन् ।
उनले लेबनानलाई अराजकतामा जानबाट रोक्न हरसम्भव कदम चाल्नुपर्नेमा जोड दिए । म्याक्रोँले इरान समर्थित संगठन हिजबुल्लाहलाई स्थिति थप नबिगार्न आग्रह गरेका छन् । साथै, उनले इजरायललाई 'तीव्र बमबारी' र 'ठूलो स्तरका आक्रमणहरू' रोक्न भने।
उनका अनुसार लेबनानी सरकारले इजरायलसँग प्रत्यक्ष वार्ता गर्ने इच्छा देखाएको छ। उनले भने, 'इजरायलले यो मौकाको फाइदा उठाउनुपर्छ, वार्ता सुरु गर्नुपर्छ र युद्धविराम कायम गर्नुपर्छ।'
लेबनानको सार्वभौमसत्ता जोगाउन र स्थायी समाधान खोज्नका लागि फ्रान्सले यो वार्तामा सहयोग गर्न र पेरिसमा यसको आयोजना गर्न तयार रहेको उनले स्पष्ट पारे ।
