जिल्ला अस्पताल धनकुटामा ब्लड बैंक स्थापना गर्ने प्रक्रिया अघि बढाइएको छ। नेपाल रेडक्रस सोसाइटी जिल्ला शाखा धनकुटाको व्यवस्थापनमा सञ्चालन हुने ब्लड बैंकका लागि आवश्यक उपकरण खरिद गर्ने निर्णय गरिएको हो।
आइतबार बसेको ब्लड बैंक खरिद इकाइ समितिको बैठकले ब्लड बैंक सञ्चालनका लागि आवश्यक उपकरण खरिद गर्ने निर्णय गरेको समितिका संयोजक ठगेन्द्रप्रसाद अधिकारीले जानकारी दिए। उनका अनुसार ब्लड बैंक सञ्चालनका लागि १६ लाख ५० हजार रुपैयाँ बराबरका उपकरण खरिद गर्ने निर्णय गरिएको हो।
बैठकमा विभिन्न सरकारी कार्यालयका प्रतिनिधि तथा सरोकारवाला निकायका प्रतिनिधि सहभागी थिए। समितिले उपकरण खरिदका लागि सार्वजनिक सूचना प्रकाशन गरी प्रक्रिया अघि बढाउने निर्णयसमेत गरेको जनाएको छ।
जिल्ला अस्पतालमा ब्लड बैंक स्थापना भएपछि धनकुटासहित आसपासका जिल्लाका बिरामीलाई रक्तसञ्चार सेवा सहज रूपमा उपलब्ध हुने अपेक्षा गरिएको छ। आकस्मिक अवस्था तथा जटिल उपचारका क्रममा यसले महत्त्वपूर्ण सहयोग पुग्ने विश्वास गरिएको छ।
ब्लड बैंक स्थापना गर्ने पहलका लागि गैरआवासीय नेपाली संघ (एनआरएनए) सचिवालयका प्रमुख कार्यकारी अधिकृत राजेन्द्रकुमार राउतको पहलमा १६ लाख ४५ हजार रुपैयाँ संकलन भइसकेको छ।
ब्लड बैंक स्थापनाका लागि आवश्यक सहयोग जुटाउने क्रम जारी रहेको ब्लड बैंक खरिद इकाइ समितिका सदस्य तथा नेपाल पत्रकार महासंघ धनकुटाका अध्यक्ष विदुर खवासले बताए।
