: इरानी रिभोलुसनरी गार्ड कप्र्स (आईआरजीसी) ले इजरायली प्रधानमन्त्री बिन्यामिन नेतन्याहूलाई खोजेर मार्ने धम्की दिएको छ ।


उनलाई बालबालिकाको हत्यारा संज्ञा दिँदै जीवित भए खोजेर मार्ने कडा धम्की आएको हो। आईआरजीसीले भनेको छ, 'यदि इजरायली प्रधानमन्त्री बिन्यामिन नेतन्याहू जीवित छन् भने, हामी उनको पिछा गरेर उनलाई मार्नेछौँ।'


इरानको सरकारी समाचार एजेन्सी ;इर्ना'ले सामाजिक सञ्जालमार्फत यसको जानकारी दिएको हो। त्यस्तै, दक्षिण अफ्रिकास्थित इरानी दूतावासले लेखेको छ, 'नेतन्याहू जीवित छन् वा मरिसकेका छन्, यसले केही फरक पार्दैन। मिनाबकी एक बालिकाको कपालको एउटा रेशा पनि उनको सम्पूर्ण अस्तित्वभन्दा कयौँ गुणा बढी मूल्यवान् छ।'

किन उठ्यो नेतन्याहूको मृत्युको प्रश्न ?

यदि नेतन्याहू जीवित छन् भन्ने आईआरजीसीको भनाइले धेरै आशंका उब्जाएको छ। वास्तवमा, केही समयदेखि सामाजिक सञ्जालमा नेतन्याहूको मृत्यु भएको वा उनी गम्भीर घाइते भएको हल्ला फैलिएको थियो। यद्यपि, इजरायली प्रधानमन्त्रीको कार्यालयले यी खबरहरूलाई 'फेक न्यूज' भन्दै खण्डन गरिसकेको छ।

यसैबीच, आइतबार साँझ नेतन्याहूको एउटा भिडियो सार्वजनिक भएको छ जसमा उनी कफी पिउँदै गरेको र क्यामेराको अगाडि पालैपालो आफ्ना दुवै हात देखाइरहेका छन्।

हात देखाउनुको पछाडिको रहस्य

नेतन्याहूका हालैका केही भिडियोहरूलाई लिएर सामाजिक सञ्जालमा दाबी गरिएको थियो कि ती भिडियो एआई द्वारा बनाइएका हुन्। केही प्रयोगकर्ताहरूले भिडियोको एउटा फ्रेममा नेतन्याहूको एउटा हातमा छ वटा औँला देखिएको दाबी गर्दै उनी मरिसकेको र यो एआई जेनरेटेड भिडियो भएको तर्क गरेका थिए। यही भ्रम चिर्न पछिल्लो भिडियोमा उनले आफ्ना दुवै हात स्पष्ट रूपमा देखाएका हुन्, जसमा पाँच-पाँच वटा औँलाहरू नै देखिन्छन्।

तनावको मुख्य कारण: मिनाब स्कुल हमला

अमेरिका-इजरायल र इरानबीचको तनाव बढ्दै जाँदा, इरानी अधिकारीहरूले दक्षिण इरानको मिनाब सहरमा रहेको एउटा विद्यालयमा हमला भएको बताएका थिए। उक्त हमलामा १६० भन्दा बढी छात्रा र कर्मचारीको मृत्यु भएको दाबी गरिएको छ। यस घटनाले इरानमा ठूलो आक्रोश पैदा गरेको छ र आईआरजीसीको पछिल्लो धम्कीलाई यसै घटनाको प्रतिशोधको रूपमा हेरिएको छ।

अफवाह र वास्तविकता

अमेरिकी राजनीतिक टिप्पणीकार कैंडिस ओवेन्सले नेतन्याहूको स्वास्थ्यलाई लिएर केही कुरा लुकाउन खोजिएको र अधिकारीहरूलाई चुप बस्न दबाब दिइएको आरोप लगाएकी छन्। नेतन्याहूका छोरा यायर नेतन्याहूले मार्च ९ पछि सामाजिक सञ्जालमा केही पोस्ट नगरेका कारण परिवारमा केही अप्रिय घटना भएको हुनसक्ने अड्कलबाजी काटिएको थियो।

एलन मस्कको एआई च्याटबट 'ग्रोक' ले यी सबै दाबीहरू गलत भएको र भिडियोमा देखिएको औँलाको विषय केवल नजरको धोका मात्र भएको स्पष्ट पारेको छ। हालसम्मको वस्तुस्थिति अनुसार, बिन्यामिन नेतन्याहू बेपत्ता भएको वा इजरायल छोडेको कुनै ठोस प्रमाण छैन। उनी लगातार सार्वजनिक सम्बोधन र सैन्य रणनीति बैठकहरूमा सहभागी भइरहेका देखिन्छन्।