: प्रवासी नेपाली मञ्च, अन्तर्राष्ट्रिय कमिटीले नेपाल सरकारले वैदेशिक रोजगारीमा रहेका नेपाली श्रमिकहरूको श्रम स्वीकृति नवीकरण प्रक्रियामा गरेको अवरोधप्रति गम्भीर ध्यानाकर्षण भएको जनाएको छ।
मञ्चले सोमबार विज्ञप्ति जारी गरेर विदेशमा कार्यरत श्रमिकहरूको श्रम स्वीकृति नवीकरण प्रक्रियामा अवरोध हुँदा बीमा सुविधा तथा सामाजिक सुरक्षासम्बन्धी अधिकारहरू प्रत्यक्ष रूपमा प्रभावित हुने अवस्था सिर्जना भएको जनाएको छ।
विशेष गरी मध्यपूर्वका विभिन्न देशहरूमा कार्यरत नेपाली श्रमिकहरू अहिले श्रम नवीकरण सम्बन्धी अनिश्चितताका कारण चिन्तित बनेका विज्ञप्तिमा उल्लेख छ। कमिटीका अध्यक्ष रमेश पाण्डे र सचिव चानक राज पोखरेलद्वारा हस्ताक्षरित विज्ञप्तिमार्फत ४ वटा प्रमुख माग राखिएको छ।
वैदेशिक रोजगारीमा रहेका नेपाली श्रमिकहरूको श्रम स्वीकृति नवीकरण प्रक्रिया कुनै पनि हालतमा रोक्न नहुने, मध्यपूर्व लगायत विभिन्न देशहरूमा कार्यरत नेपाली श्रमिकहरूको वास्तविक अवस्था बुझी आवश्यक समन्वय गर्दै खोजी-खोजी श्रम नवीकरण गर्ने व्यवस्था मिलाउनुपर्ने कमिटीको माग छ।
श्रमिकहरूलाई बीमित भई सुरक्षित रूपमा काम गर्न पाउने अधिकार सुनिश्चित गर्दै उनीहरूको श्रम, सामाजिक सुरक्षा तथा बीमा सम्बन्धी अधिकारमा कुनै पनि प्रकारको बन्देज नलगाइने स्पष्ट नीति अवलम्बन गर्नुपर्ने र नयाँ श्रम स्वीकृति तत्काल दिन सम्भव नभए पनि पहिले नै विदेशमा रही काम गरिरहेका श्रमिकहरूको श्रम नवीकरण प्रक्रिया यथाशीघ्र सञ्चालनमा ल्याउनुपर्ने माग राखिएको छ।
