: राष्ट्रिय स्वतन्त्र पार्टी (रास्वपा) का उपसभापति डोलप्रसाद अर्याल (डीपी) ले जनताले ‘मेरा लागि सरकार छ’ भन्ने महसुस गर्ने गरी पार्टीले काम गर्नुपर्ने जिम्मेवारी आएको बताएका छन् ।
फागुन २१ को प्रतिनिधिसभा निर्वाचनबाट रास्वपाबाट निर्वाचित प्रत्यक्ष र समानुपातिक १८२ सांसदका लागि आयोजना गरिएको प्रशिक्षण कार्यक्रमलाई सम्बोधन गर्दै उपसभापति अर्यालले बन्दै गरेको रास्वपाको सरकारले सुशासन र ‘डेलिभरी’ दिनु पर्ने आजको आवश्यकता भएको बताए । उनले रास्वपाको अब बन्ने सरकारले विशेष र फरक उपलब्धी हासिल गर्नैपर्ने बताएका छन् ।
उपसभापति अर्यालले ७० प्रतिशत भन्दा बढी मत एउटै पार्टीले पाएको इतिहास विश्वमा विरलै रहेको र त्यो अवसर रास्वपाले पाएको बताउँदै आफूहरुमाथि गहन जिम्मेवारी काँधमा आएको बताए ।
अबका दिनमा अस्पताल, विद्यालय जाँदा आफ्ना नेता खोज्नु पर्ने, कर तिर्न जाँदा ‘अण्डर टेबुल’ को अवस्था अत्इ गर्नुपर्ने बताए । उनले विविध कारणले विदेशिन वाध्य युवाहरुलाई देशमै फर्किने वातावरण बनाउन लाग्नु पर्ने आजको आवश्यकता भएको बताए ।
उनले विगत लामो समय देशको बागडोर सम्हालेका पार्टी र नेताहरुका कारण जनताले सुशासन महसुस गर्नै नपाएको बताउँदै उनले अब अनुशासित समाज निर्माण गर्नु रास्वपा र रास्वपाका सांसदहरुको काम भएको बताए । अघिल्लो संसदमा रास्वपाले सबै त्याग गर्दा पनि संख्या अपुग भएको बताउँदै उपसभापति अर्यालले अब स्पष्ट खाकासहित अगाडि बढ्नु पर्ने बताए ।
उपसभापति अर्यालले रास्वपाले २०८४ को निर्वाचनको तयारी गरिरहेका बेला फरकरुपमा आएको फागुन २१ को संघीय निर्वाचनले अब उपलब्धी हासिल गर्नैपर्छ भन्ने म्याण्डेट दिएको पनि बताए ।
देशका छोराछोरी, युवाहरुले देशमै बस्ने वातावरण बनाई दिनु पर्यो भन्दै आन्दोलनमा उत्रिँदा अघिल्लो सरकारले भदौं २३ र २४ गते दमनसहित क्रुर हत्यामा उत्रिएको आरोप लगाउँदै उपसभापति अर्यालले त्यसपछिको विषम परिस्थितिलाई सम्हाल्दै निर्वाचन गराउने सुशीला कार्की नेतृत्वको सरकार, सुरक्षाकर्मी, निर्वाचन आयोग र उत्साहपूर्वक मतदान गर्दै रास्वपालाई सबै भन्दा ठूलो पार्टी बनाउन भूमिका निर्वाह गर्नेहरुप्रति कृतज्ञता समेत व्यक्त गरे ।
