: शहीद स्मारक एन्फा महिला लिग–२०८२ मा आज भएका २ खेलमा संकटा क्लब र त्रिभुवन आर्मी क्लबले विजयी सुरुवात गरेका छन् । च्यासल मैदानमा आज भएको पहिलो खेलमा संकटा क्लबले न्यूरोड टिम (एनआरटी) लाई ४–० ले पराजित गरेको हो । संकटाले पहिलो हाफमा ३–० को अग्रता बनाएको थियो । दोस्रो हाफमा १ गोल थप्दै संकटाले खेल जितेको हो ।
संकटाका लागि खेलको छैटौं मिनेटमा विन टुनले गोल गर्दै अग्रता बनाएकी हुन् । २६ औं मिनेटमा लुसिया मोकाम्बिले गोल गर्दै संकटाको अग्रता दोब्बर बनाएकी हुन् । दोस्रो गोलको २ मिनेटपश्चात सुक्रिया मियाले गोल गर्दै पहिलो हाफ एकतर्फी रुपमा संकटाको पक्षमा परेको हो ।
खेलको ५२ औं मिनेटमा क्विनाबेल अमान्ख्राले संकटाको लागि चौथो गोल गरिन् । न्यूरोडले सान्त्वना गोल समेत फर्काउन सकेन । आजको दोस्रो खेलमा त्रिभुवन आर्मी क्लबले झापा एफसीलाई ५–० ले हराएको छ । आर्मीको जितमा अन्जना थुलुङ राईले २ गोल गरिन् ।
दिपा शाही, हिमा चौधरी र तुलसा बोहोराले १–१ गोल गरे । पहिलो हाफ गोलरहित बराबरीमा सकिँदा दोस्रो हाफमा आर्मीले ५ गोल गर्यो । खेलको ५७ औं मिनेटमा दिपा शाहीको गोलमार्फत आर्मीले अग्रता बनाएको थियो । ६८ औं मिनेटमा हिमा चौधरीले गोल गरिन् । खेलको ८६ औं मिनेट र खेलको निर्धारित समयको अन्तिम मिनेटमा अन्जनाले लगातार २ गोल गरिन् । नियमित खेलको थप गरिएको समयमा तुलसा बोहोराले गोल गर्दै आर्मीको ५–० को जित सुनिश्चित गरिन् ।
