— भदौ २४ गतेको जेनजी आन्दोलनका क्रममा जिल्ला अदालत घोराहीलाई आगलागी र तोडफोडबाट बचाउन महत्त्वपूर्ण भूमिका खेल्ने प्रहरी हवल्दार संगीता अधिकारीलाई सर्वोच्च अदालतले सम्मान गरेको छ ।
प्रधानन्यायाधीश प्रकाशमान सिंह राउतले मंगलबार जिल्ला अदालत घोराहीमा आयोजित कार्यक्रममा अधिकारीलाई २५ हजार नगद र सम्मानपत्रसहित पुरस्कृत एवं सम्मानित गरेका हुन् । पुरस्कृत गर्दै राउतले एक जना प्रहरीको प्रयासले मात्रै पनि अदालत बचाउन सम्भव भएकामा आफूलाई गर्वको महसुस भएको बताए ।
अधिकारीले आफ्नो जागिर र जिम्मेवारीभन्दा माथि उठेर अदालत बचाउन लागिपरेको कुराले आफ्नो मन छोएको राउतले बताए । ‘उहाँको अदालत बचाउने निरन्तरको प्रयास देखेर म प्रभावित भएँ । मेरो मन छोयो,’ उनले भने,‘यो सामान्य ड्युटीभन्दा फरक काम थियो । न्यायालयप्रतिको माया थियो । त्यसकारण म आफैं पुगेर सम्मानित गर्ने इच्छा राखेको हुँ ।’
यस्ता जटिल परिस्थितिमा अधिकारी जस्तै जिम्मेवारीबोध गरेर सबै प्रहरी, सुरक्षाकर्मी र अन्य राष्ट्रसेवक कर्मचारीले काम गर्नुपर्ने धारणा उनले व्यक्त गरे । ‘अधिकारीबाट सबैले सिक्नुपर्छ । देश अप्ठेरोमा परेका बेला कर्तव्य कसरी निर्वाह गर्ने भन्ने सन्देश सबैले लिनुपर्छ,’ उनले भने,‘देशका महत्त्वपूर्ण संरचना बचाउने दायित्व सबैको हो । अधिकारीलाई सम्मान गर्न पाउँदा म हर्षित छु ।’
अधिकारीले जिल्ला अदालत जलाउन र तोडफोड गर्न थालेका आन्दोलनकारीलाई सम्झाइबुझाइ र अनुनयविनय गर्दै पछि हट्न बाध्य पारेकी थिइन् । घोराही उपमहानगरपालिका–९ चैनपुर निवासी अधिकारी अदालत बचाउने समयमा प्रहरी सहायक हवल्दार थिइन् । उनको भूमिकाको कदर गर्दै आन्दोलनपछि प्रहरी हवल्दारमा बढुवा गरिएको थियो ।
अधिकारीको निरन्तरको आग्रहपछि आन्दोलनकारी फर्केका थिए । जसका कारण अदालतमा केही क्षति भए पनि धेरै क्षति हुनबाट बचेको जिल्ला अदालतका मुख्य न्यायाधीश प्रकाशप्रसाद पण्डितले बताए । कार्यक्रममा आन्दोलनका क्रममा अदालतको सुरक्षामा खटेका अन्य प्रहरीलाई पनि सम्मान गरिएको थियो ।
