— पहिलो पटक सहिद स्मारक महिला लिग फुटबल बुधबार सुरु हुँदा संकटा र त्रिभुवन आर्मी क्लबले अपेक्षित नतिजा निकालेका छन् ।
च्यासल रंगशालामा भएको दिनको पहिलो खेलमा संकटाले एनआरटीलाई ४–० ले हरायो । टोलीले पहिलो खेलबाटै विभागीय टिमलाई उपाधिमा चुनौती दिने संकेत गरेको छ । खेलमा टोलीका विदेशी खेलाडी चम्किए । चारमध्ये तीन गोल उनै विदेशी खेलाडीकै नाममा रह्यो ।
संकटाले पाँचौं मिनेटमै म्यानमारकी विन येङ्गी टुनको गोलबाट अग्रता लिएको थियो । उनी नै नेपालको घरेलु महिला फुटबलमा खेल्ने सबैभन्दा ठूलो विदेशी नाम रहेको छ । त्यसपछि लुसिया लेइलाले २६ औं मिनेटमा दोस्रो गोल थपिन् । लगत्तै २८ औं मिनेटमा सुक्रिया मियाले तेस्रो गोल गरिन् । दोस्रो हाफको ५३ औं मिनेटमा सम्भवतः चौथो गोल क्विनवेल एकोसुआको नाममा रह्यो ।
दोस्रो खेलमा आर्मीले झापा एफसीलाई ५–० ले पराजित गरेको थियो । यसमा पाँचै गोल दोस्रो हाफमा भएको थियो । त्यसमध्ये पनि अन्तिम गोल खेलको अन्त्यतिर भएको हो । पहिलो हाफ गोलरहित बराबरीको स्थितिमा रहेपछि झापाले केही आस देखाएको थियो । एक प्रकारले आर्मी दबाबमा आएको थियो, गोल निकाल्न नसकेर ।
तर ५७ औं मिनेटमा दीपा शाहीले पहिलो गोल गरेपछि आर्मी रोकिएन । हिमा चौधरीले ६८ औं मिनेटमा दोस्रो गोल गरिन् । त्यसपछि अञ्जना थुलुङ राईले ८६ औं र इन्ज्युरी समयको पहिलो मिनेटमा गरी दुई गोल गरिन् । तुलसा बोहराले इन्ज्युरी समयको छैटौं मिनेटमा गोल थपिन् । यससँगै आर्मी ३ अंकमा गोल अन्तरले शीर्षस्थानमा रह्यो भने संकटा दोस्रो स्थानमा ।
