— तरकारी उत्पादनमा प्रविधिको प्रयोग गर्दै आय आर्जन बढाउन सहयोग पुर्याउन १० जना कृषकलाई ५० प्रतिशत अनुदानमा मिनिटिलर वितरण गरिएको छ ।
राष्ट्रिय कृषि आधुनिकीकरण कार्यक्रम, कार्यक्रम कार्यान्वयन एकाइ जितपुरद्वारा सहकारीमा आधारित कृषकद्वारा गरिने चकलाबन्दी कार्यक्रमअन्तर्गत मिनिटिलर प्रदान गरिएको हो ।
कार्यक्रम कार्यान्वयन इकाइका प्रमुख राकेश ओझाले बुद्धभूमि नगरपालिका–१० मा रहेको धनकौली कृषि सहकारी संस्थाका अध्यक्ष महन्त केवटलाई हस्तान्तरण गरे । सहकारीमा आबद्ध कृषकलाई लहरे तरकारी बाली लगाउन प्रोत्साहन गर्ने उद्देश्यले मिनिटिलर प्रदान गरिएको हो । ७५ हजार लागत रहेको मिनिटिलरको ५० प्रतिशत मूल्य अनुदान दिइएको छ ।
मिनिटिलरसँगै स्प्रे टंकी, सिंचाइका लागि १० किलो डेलिभरी पाइप, रेशम धागो र बीउ बिषादी प्रदान गरिएको छ । मिनिटिलर जोत्न र गोडमेल गर्न उपयोगी छ । त्यस्तै अहिले वितरित मिनिटिलरमा सिंचाइ र स्प्रे गर्न थप उपकरण जोडेर गर्न सकिने सुविधा दिइएको छ ।
जिल्लामा बुद्धभूमि नगरपालिका–१० तरकारी उत्पादनको राम्रो पकेट क्षेत्र मानिन्छ ।
