: रमजान पर्व सुरु भएको समयमा इजरायलको जेरुसेलमका पवित्र धार्मिक स्थलहरू नजिक मिसाइल आक्रमण भएको घटनाप्रति काठमाडौंस्थित इजरजायली दूतावासले गहिरो चिन्ता व्यक्त गर्दै कडा निन्दा गरेको छ।
दूतावासले प्रेस विज्ञप्ति जारी गरेर इरानी शासनले १६ मार्चको रात जेरुसेलम र पुरानो सहर क्षेत्रका तीनै धर्मसँग सम्बन्धित पवित्र स्थलहरूलाई लक्षित गर्दै मिसाइल प्रहार गरेको आरोप लगाएको छ। उक्त आक्रमणका भग्नावशेषहरू अल-अक्सा मस्जिद परिसर, चर्च अफ द होली सेपल्कर, टेम्पल माउन्ट तथा वेस्टर्न वाल नजिक खसेको उल्लेख गरिएको छ।
विज्ञप्तिमा भनिएको छ, 'यस प्रकारका आक्रमणले जेरुसेलममा बसोबास गर्ने १० लाखभन्दा बढी यहूदी, मुस्लिम र ईसाई समुदायका नागरिकहरूलाई प्रत्यक्ष जोखिममा पारेको छ।' रमजानजस्तो पवित्र धार्मिक अवधिमा इस्लामका महत्वपूर्ण स्थलहरू लक्षित गरिनु धार्मिक मूल्य र आध्यात्मिकताप्रति गम्भीर अवहेलना भएको दाबी गरिएको छ।
दूतावासले यस्ता घटनाले इजरायलले मुस्लिमहरूको धार्मिक स्वतन्त्रता सीमित गरेको भन्ने आरोपहरूलाई आधारहीन देखाउने पनि उल्लेख गरेको छ। त्यस्ता दाबीहरू तथ्यहीन र तनाव भड्काउने उद्देश्यले गरिएको प्रयास मात्र भएको विज्ञप्तिमा जनाइएको छ। साथै, इजरायलले सबै धर्मका पवित्र स्थलहरूको संरक्षण गर्दै उपासकहरूको सुरक्षाका लागि आवश्यक रक्षात्मक उपाय अपनाउँदै आएको दाबी गरिएको छ।
दूतावासले पवित्र स्थलहरूमा गरिएको यस्तो आक्रमण अस्वीकार्य भएको बताउँदै यसले मानव जीवनसँगै धार्मिक सहअस्तित्व, सम्मान र स्वतन्त्रताजस्ता साझा मूल्यहरूलाई समेत जोखिममा पार्ने चेतावनी दिएको छ। सबै धर्मावलम्बीले सुरक्षित र स्वतन्त्र रूपमा आफ्नो धर्म पालन गर्न पाउने वातावरण सुनिश्चित गर्न आफू प्रतिबद्ध रहेको पुनः दोहोर्याइएको छ।
