— भारतीय र्यापर तथा गायक बादशाह (आदित्य प्रतीक सिंह सिसोदिया) को पछिल्लो हरियाणवी गीत 'तत्तेरी' लाई लिएर उत्पन्न विवाद थप चर्किएको छ ।
गीतमा अश्लीलता प्रदर्शन गरिएको र महिलालाई अपमानजनक ढंगले चित्रण गरिएको भन्दै भारतको राष्ट्रिय महिला आयोगले बादशाहसहित निर्माण टोलीलाई उपस्थित हुन आदेश दिएको छ ।
आयोगले सञ्चारमाध्यममा आएका रिपोर्टहरूका आधारमा स्वतः यो कदम चालेको हो । गीतको विषयवस्तुले कानुनको उल्लंघन गरेको आयोगको प्रारम्भिक निष्कर्ष छ ।
राष्ट्रिय महिला आयोगले एक विज्ञप्ति जारी गर्दै 'तत्तेरी' गीतमा प्रयोग गरिएका शब्द र दृश्यहरू आपत्तिजनक रहेको बताएको छ । आयोगका अनुसार यो गीत भारतीय न्याय संहिता, सूचना प्रविधि ऐन र महिलाको अश्लील प्रतिनिधित्व (निषेध) ऐन, १९८६ को प्रावधानविपरीत देखिएको छ ।
आयोगले बादशाहसहित भिडियो निर्देशक माही सन्धु, सह-निर्देशक जोबन सन्धु र निर्माता हितेनलाई आगामी मार्च २५ मा दिउँसो १२:३० बजे आवश्यक कागजातसहित उपस्थित हुन निर्देशन दिएको छ ।
तोकिएको समयमा उपस्थित नभए कानुनी कारबाही अघि बढाउने चेतावनीसमेत आयोगले दिएको छ ।
गत मार्च १ मा सार्वजनिक भएको यस गीतमा महिलाहरूलाई 'अब्जेक्टिफाई'गरिएको र स्कुलको पोसाकमा रहेका बालिकाहरूलाई हरियाणा रोडवेजको बसभित्र आपत्तिजनक हाउभाउमा नृत्य गराइएको आरोप छ ।
सामाजिक सञ्जालमा उक्त भिडियोका दृश्यहरूलाई लिएर तीव्र आलोचना भएपछि यो विवाद हरियाणाबाट सुरु भई अन्य राज्यहरूमा समेत फैलिएको थियो ।
विवाद बढ्दै गएपछि पञ्चकुला, जिन्द र पानीपतलगायतका जिल्लाहरूमा बादशाहविरुद्ध उजुरी दर्ता भएको छ । उनी देशबाहिर जान नपाउन भनी 'लुकआउट सर्कुलर' समेत जारी गरिएको भारतीय सञ्चारमाध्यमहरूले उल्लेख गरेका छन् ।
कागुनी झमेला र जनआक्रोश बढ्दै गएपछि बादशाहले उक्त गीतलाई युट्युबलगायत सबै प्लाटफर्मबाट हटाएका छन् । मार्च ७ मा एक भिडियो सन्देश जारी गर्दै उनले यस घटनाप्रति खेद व्यक्त गरेका छन् । ‘मेरो उद्देश्य महिला वा बालबालिकाको भावनामा चोट पुर्याउने थिएन ।
गीतका शब्दहरू हिप-हप शैलीको प्रतिस्पर्धात्मक धारमा लेखिएका थिए,’ बादशाहले स्पष्टीकरण दिँदै भनेका छन्, ‘म हरियाणवी हुनुमा गर्व गर्छु र यो संस्कृतिलाई विश्वसामु चिनाउन चाहन्थेँ । यद्यपि, कसैलाई चोट पुगेकोमा म क्षमाप्रार्थी छु ।’
