: इरान र इजरायलबीच बढ्दो सैन्य तनावका बीच इरानले कतारको प्रमुख ऊर्जा केन्द्र रास लाफानमा पुनः मिसाइल आक्रमण गरेको दाबी गरेको छ। बुधबार राति इजरायलले इरानको 'साउथ पार्स' ग्यास क्षेत्रमा गरेको हमलाको बदलामा इरानले कतारको 'रास लाफान' औद्योगिक क्षेत्रलाई निशाना बनाएको हो । इरानी सरकारी टेलिभिजनका अनुसार यो आक्रमण अमेरिकी राष्ट्रपति डोनाल्ड ट्रम्पले चेतावनी दिनुअघि नै गरिएको हो।
घटनाको विवरण कतारको सरकारी ऊर्जा कम्पनीले बिहीबार बिहान आफ्नो मुख्य ग्यास क्षेत्रमा रकेट प्रहार भएको पुष्टि गरेको छ। आक्रमणबाट प्लान्टमा ठूलो आगलागी हुनुका साथै भौतिक क्षति पुगेको छ, यद्यपि कुनै मानवीय हताहतीको खबर भने प्राप्त भएको छैन। इरानले यसअघि पनि इजरायली आक्रमणको बदला लिन कतारको रास लाफान औद्योगिक क्षेत्रलाई निशाना बनाएको थियो।
आक्रमणलाई लिएर ट्रम्पको कडा चेतावनी
अमेरिकी राष्ट्रपति डोनाल्ड ट्रम्पले सामाजिक सञ्जाल 'एक्स'मार्फत इरानलाई निकै कडा शब्दमा चेतावनी दिएका छन्। उनले लेखेका छन्,' यदि कतारको एलएनजी केन्द्रमाथि फेरि आक्रमण भयो भने, म इरानको साउथ पार्स ग्यास क्षेत्रलाई पूर्ण रूपमा ध्वस्त पार्न कति पनि हिचकिचाउने छैन।'
उनका अनुसार अमेरिकाले इजरायलको सहयोगमा वा एक्लै पनि इरानको ग्यास क्षेत्रलाई अहिलेसम्मकै शक्तिशाली प्रहार गरेर नष्ट गरिदिनेछु। ट्रम्पले भने, 'म यस्तो स्तरको हिंसा र विनाश चाहन्न किनकि यसले इरानको भविष्यमा दीर्घकालीन असर पार्नेछ, तर कतारमाथिको आक्रमण अब सह्य हुने छैन।'
यो द्वन्द्व इजरायलले इरानको 'साउथ पार्स' ग्यास क्षेत्रमा गरेको हमलापछि सुरु भएको हो। त्यसको जवाफमा इरानले कतारको पेट्रोलियम प्लान्ट र विश्वकै ठूलो ग्यास प्रशोधन केन्द्र रास लाफानलाई निशाना बनाउँदै आएको छ।
वर्तमान अवस्थामा कतारका ऊर्जा केन्द्रहरूमा लागेको आगो निभाउने र सुरक्षा कडा पार्ने काम भइरहेको छ भने मध्यपूर्वमा ठूलो युद्धको खतरा बढेको छ।
