:साउदी अरेबियामा इरानले ड्रोन र मिसाइल आक्रमण तीव्र पारिएको छ। पछिल्ला केही दिनयता जारी आक्रमणको क्रममा बुधबार राति राजधानी रियादसहित पूर्वी प्रान्त लक्षित गरी २१ भन्दा बढी ड्रोन र क्षेप्यास्त्र प्रहार गरिएको साउदी पक्षले जनाएको छ।
साउदीको हवाई प्रतिरक्षाले ती सबै आक्रमणलाई निस्तेज पार्दै अधिकांश ड्रोन र मिसाइल हावामै नष्ट गरेको जनाएको छ। रियादतर्फ प्रहार गरिएका चारवटा ब्यालिस्टिक क्षेप्यास्त्र रोकिएको र अल–खार्ज क्षेत्रमा थप एक क्षेप्यास्त्र खसालिएको बताइएको छ। पूर्वी प्रान्तमा समेत छवटा आक्रमणकारी ड्रोन नष्ट गरिएको जनाइएको छ।
नष्ट गरिएका ड्रोन र क्षेप्यास्त्रका भग्नावशेष प्रिन्स सुल्तान एयर बेस आसपाससहित विभिन्न क्षेत्रमा खसेका छन्। प्रतिरक्षाका क्रममा खसेका भग्नावशेषबाट चारजना एसियाली नागरिक घाइते भएको जनाइएको छ।
साउदी रक्षा मन्त्रालयका अनुसार अवरोध गरिएका क्षेप्यास्त्रका छर्रा राजधानीका विभिन्न भाग तथा शहरको दक्षिणमा रहेको रिफाइनरी क्षेत्रमा खसेका थिए। आवश्यकताअनुसार रियादमा हवाई प्रतिरक्षा प्रणाली सक्रिय अवस्थामा राखिएको छ।
बुधबार रातिको आक्रमणपछि साउदी विदेशमन्त्री फैसल बिन फरहानको पहलमा क्षेत्रीय सुरक्षा विषयमा आपतकालीन बैठकका लागि अरब तथा इस्लामिक देशका विदेशमन्त्रीहरू रियादमा भेला भएका छन्। यस विषयमा आन्तरिक छलफल तीव्र रूपमा जारी रहेको र आवश्यक निर्णय समयानुकूल गरिने बताइएको छ।
साउदी प्रेस एजेन्सीका अनुसार पछिल्लो समय राज्यभर अवरोध गरी नष्ट गरिएका शत्रु ड्रोनको संख्या २०० भन्दा बढी पुगेको छ भने करिब ३५ वटा क्षेप्यास्त्र पनि खसालिएको छ। तीमध्ये अधिकांश ब्यालिस्टिक र केही क्रुज मिसाइल रहेका छन्। हालसम्म ठूलो मानवीय क्षति नभएको जनाइएको छ।
गत फेब्रुअरी २८ देखि संयुक्त राज्य अमेरिका र इजरायलद्वारा इरानी भू–भागमा गरिएको हवाई आक्रमणको बदला स्वरूप इरानले खाडी क्षेत्रका सैन्य तथा नागरिक संरचनालाई लक्षित गर्दै आक्रमण गरिरहेको छ।
यद्यपि पछिल्लो आक्रमणले तनाव थप बढाए पनि साउदीमा कार्यरत नेपालीहरू हालसम्म सुरक्षित रहेको जनाइएको छ।
