: इरानले गत जनवरीमा भएको राष्ट्रव्यापी सरकार विरोधी प्रदर्शनका क्रममा दुई प्रहरी अधिकारीको हत्या गरेको अभियोगमा तीन जना प्रदर्शनकारीलाई मृत्युदण्ड दिएको छ। रोयटर्सले इरानको न्यायिक समाचार निकाय 'मिजान'लाई उद्धृत गर्दै यो जानकारी दिएको हो।
इरानी न्यायपालिकाका अनुसार उनीहरूलाई हत्या र 'ईश्वर विरुद्ध युद्ध छेडेको'अभियोगमा दोषी ठहर गरिएको थियो। साथै, उनीहरूमाथि इजरायल र अमेरिकाको पक्षमा काम गरेको आरोप समेत लगाइएको छ।
आर्थिक अवस्थाको विरोधबाट सुरु भएको यो आन्दोलन पछि इरानी सरकार विरुद्धको राष्ट्रव्यापी प्रदर्शनमा परिणत भएको थियो।
अमेरिकास्थित मानव अधिकार कार्यकर्ता समाचार निकायका अनुसार उक्त प्रदर्शनका क्रममा करिब ६,४८८ प्रदर्शनकारी मारिएका छन्। यस तथ्याङ्कमा ज्यान गुमाउने २३६ बालबालिका, प्रदर्शनमा सहभागी नभएका ७६ व्यक्ति र २०७ सैनिक तथा सरकारी सुरक्षाकर्मीको संख्या समावेश गरिएको छैन।
