— पश्चिम एशियामा जारी युद्धसम्बन्धी 'भ्रामक सामग्री' सामाजिक सञ्जालमा सेयर गरेको आरोपमा संयुक्त अरब इमिरेट्स, साउदी अरब र कुवेतमा कम्तीमा ७ नेपाली पक्राउ परेका छन्। यूएई र साउदीमा ३–३ जना तथा कुवेतमा १ जना पक्राउ परेका हुन्।
परराष्ट्र मन्त्रालयका अनुसार दूतावासहरूले बारम्बार सचेत गराउँदा पनि अपुष्ट सामग्री पोस्ट गर्नेक्रम रोकिएको छैन। यूएईको कानुनअनुसार यस्तो कार्यमा संलग्नलाई १–२ वर्षसम्म कैद र १ लाखदेखि २ लाख दिरहमसम्म जरिवाना हुन सक्ने बताइएको छ।
सरकारले खाडीमा रहेका नेपालीलाई स्थानीय कानुन पालना गर्न र सामाजिक सञ्जालमा संवेदनशील सामग्री नसेयर गर्न आग्रह गरेको छ।
यसैबीच युद्धका कारण १ नेपालीको मृत्यु र २० जना घाइते भइसकेका छन् भने घाइतेहरू उपचारपछि काममा फर्किएका छन्। अवस्था थप जटिल भएमा सरकारले उद्धार योजना अघि बढाउने तयारीसमेत गरेको जनाएको छ।
