— आगामी कन्नड फिल्म ‘केडी: द डेभिल’ को बहुप्रतिक्षित गीत ‘सर्के चुनर तेरी सर्के’ यतिबेला विवादमा मुछिएको छ ।
विवाद चर्किएपछि निर्माण पक्षले यसको हिन्दी संस्करण युट्युबबाट हटाएको छ ।
सामाजिक सञ्जालमा गीतको शब्द र दृश्यलाई लिएर तीव्र आलोचना भएपछि र सेन्सर बोर्डमा उजुरी परेपछि गीत युट्युवबाट हटाइएको हो ।
केभीएन प्रोडक्सन्सले गत शुक्रबार गीतको प्रोमो र शनिबार पूरा भिडियो सार्वजनिक गरेको थियो । नोरा फतेही र सञ्जय दत्त फिचर्ड यस गीतको कन्नड, तमिल, तेलुगु र मलयालम संस्करणहरू भने अझै अनलाइनमा उपलब्ध छन् ।
अधिवक्ता विनीत जिन्दलले केन्द्रीय फिल्म प्रमाणन बोर्डमा उजुरी दर्ता गर्दै गीतमा ‘अत्यधिक अश्लील, यौन उत्तेजक र आपत्तिजनक’ शब्दहरू प्रयोग भएको दाबी गरेका छन् । उजुरीमा यो गीतले सार्वजनिक नैतिकतामा खलल पुर्याउने र नाबालिगहरूका लागि हानिकारक हुने उल्लेख गरिएको छ ।
सूचना तथा प्रसारण मन्त्रालयलाई समेत बोधार्थ दिइएको उक्त उजुरीमा गीतलाई सबै डिजिटल प्लेटफर्मबाट स्थायी रूपमा हटाउन माग गरिएको छ । अधिवक्ता जिन्दलले यस विषयमा दिल्ली पुलिसको साइबर सेलमा समेत छुट्टै आपराधिक उजुरी दर्ता गराएका छन् ।
भारतीय न्याय संहिता को धारा २९४, पोक्सो ऐन र सूचना प्रविधि ऐन बमोजिम कारबाही गर्न माग गरिएको छ ।
गीत सार्वजनिक भएलगत्तै सामाजिक सञ्जालमा प्रयोगकर्ताहरूले यसको कडा आलोचना गरेका थिए । एक्स (ट्विटर) मा एक प्रयोगकर्ताले लेखेका छन्, ‘नोरा फतेहीको यो नयाँ गीतले अश्लीलताको सबै सीमा पार गरेको छ ।’
अर्का प्रयोगकर्ताले भारतीय सेन्सर बोर्डको भूमिकामाथि प्रश्न उठाउँदै लेखेका छन्, ‘के भारतमा सेन्सर बोर्ड छ ? यस्ता द्विअर्थी र अश्लील शब्द भएका गीतहरूलाई कसरी अनुमति दिइन्छ ?’
धेरैले यो गीतले युवा पुस्ता र बालबालिकामा नकारात्मक असर पार्ने भन्दै चिन्ता व्यक्त गरेका छन् ।
‘केडी: द डेभिल’ सन् १९७० को दशकको पृष्ठभूमिमा आधारित एक एक्सन क्राइम ड्रामा हो । प्रेमद्वारा निर्देशित यस फिल्ममा ध्रुव सरजा, सञ्जय दत्त, शिल्पा शेट्टी र रेश्मा नानायाको मुख्य भूमिका रहेको छ ।
यो फिल्म आगामी अप्रिल ३०, २०२६ मा प्रदर्शन हुने तालिका रहेको छ ।
विवादास्पद हिन्दी संस्करणको गीतमा मङ्लीको स्वर, रकिब आलमको शब्द र अर्जुन जन्यको संगीत रहेको थियो ।
विवाद चर्किएपछि नोरा फतेहीले भने आफूले गीतको शब्द नसुनेको र यसको जिम्मेवार निर्माण पक्ष नै हुने भन्दै बचाउ गरेकी छिन् ।
