: इराकस्थित सशस्त्र समूह 'इस्लामिक रेसिस्टेन्स' ले पछिल्लो २४ घण्टामा 'इराक र यस क्षेत्रका दुश्मनका ठेगानाहरू विरुद्ध' २७ वटा सैन्य अपरेसन गरेको दाबी गरेको छ। यस अन्तर्गत दर्जनौँ ड्रोन र मिसाइल आक्रमणहरू गरिएको समूहले जनाएको छ।
यो दाबी बगदाद अन्तर्राष्ट्रिय विमानस्थल नजिकै रहेको अमेरिकी कूटनीतिक सुविधामा पुनः ड्रोन हमला भएको खबरपछि आएको हो ।
समाचार एजेन्सी एएफपीका अनुसार, कूटनीतिक र लजिस्टिक हबका रूपमा चिनिने उक्त स्थानमा कम्तीमा तीनवटा हमला भएका छन्। स्रोतका अनुसार सो क्षेत्रमा अमेरिकी सैनिकहरू बस्दै आएका छन्।
एक अधिकारीले एएफपीलाई बताए अनुसार तेस्रो हमलापछि उक्त सैन्य ठेगाना नजिकै भीषण आगलागी भएको छ। केही दिन अघि मात्रै बगदादस्थित अमेरिकी दूतावासमा कयौँ ड्रोन र रकेट प्रहार भएका थिए। अघिल्लो हप्ता पनि सोही दूतावासलाई लक्षित गरी आक्रमण गरिएको थियो।
मध्यपूर्वमा जारी युद्ध र तनावका बीच इराकमा रहेका अमेरिकी सैन्य र कूटनीतिक निकायहरूमाथि हुने आक्रमणमा उल्लेख्य वृद्धि भएको छ। इस्लामिक रेसिस्टेन्सले यी हमलाहरूलाई आफ्नो रणनीतिक प्रतिकारको हिस्सा बताएको छ, जसले गर्दा क्षेत्रको सुरक्षा अवस्था थप चुनौतीपूर्ण बनेको छ।
