: रुकुम पूर्वमा निरन्तरको हिमपातका कारण मध्यपहाडी लोकमार्ग आज बिहानदेखि नै अवरुद्ध भएको छ । गए रातिदेखि जारी भारी हिमपातले भुमे गाउँपालिका–१ स्थित लुकुम–पातिहाल्ना सडक खण्ड पूर्ण रूपमा ठप्प बनेको हो । सडक अबरुद्ध भएपछि सयौं यात्रु सडकमै अलपत्र परेका छन् ।
जिल्ला प्रहरी कार्यालय रुकुम पूर्वका प्रहरी निरीक्षक तथा सूचना अधिकारी लालबहादुर बिकका अनुसार काठमाडौंबाट छुटेका विभिन्न रात्रि बसहरू फसेका छन् । उनका अनुसार उक्त क्षेत्रमै ७ वटा बस, १ जीप र ५ वटा मोटरसाइकल अड्किएका छन् भने २५० भन्दा बढी यात्रु प्रभावित भएका छन् ।
हिमपातकै कारण फोन सेवा समेत ठप्प हुँदा यात्रु र सुरक्षाकर्मी दुबैले थप कठिनाइ व्यहोर्नु परेको छ । प्रहरीले यात्रुहरूको उद्धार तथा सडक व्यवस्थापनका लागि स्थानीय तहसँग समन्वय सुरु गरेको छ ।
