इस्लामिक रिभोलुसनरी गार्ड कोर्प्स (आईआरजीसी)ले इजरायली एफ-१६ लडाकु विमानलाई निशाना बनाएको दाबी गरेको छ।
बीबीसी फारसीका अनुसार इरानको आइआरएनए समाचार एजेन्सीले आईआरजीसीलाई उद्धृत गर्दै विमानलाई बिहान पौने ४ बजे क्रान्तिकारी गार्डको आधुनिक हवाई रक्षा प्रणालीले प्रहार गरेको उल्लेख गरेको छ।
आईआरजीसीले युद्ध सुरु भएदेखि लक्षित गरिएको यो तेस्रो लडाकु विमान भएको दाबी गरेको छ। तर अन्य दुई विमानको बारेमा थप विवरण उल्लेख गरिएको छैन। आईआरजीसीको विज्ञप्तिमा आज निशाना बनाइएको दाबी गरिएको विमानलाई गोली हानेर खसालिएको हो कि होइन भन्ने कुरा स्पष्ट पारिएको छैन।
यसैबीच, इजरायली सेनाले एउटा लडाकु विमानले इरानी हवाई क्षेत्रमा सतहबाट हावामा प्रहार गर्ने क्षेप्यास्त्रको सामना गरेको पुष्टि गरेको छ। इजरायलले विमान र मिसनमा कुनै क्षति नपुगेको दाबी गरेको छ।
