— अमेरिकाको भर्जिनिया राज्यस्थित फेयरफ्याक्स काउन्टीको मान्तुवाको एक अपार्टमेन्टमा गत फेब्रुअरी २४ सोमबार बिहान ५:१५ बजे नेपाली परिवारमा भएको विभत्स हत्याकाण्डको फुटेज सार्वजनिक गरिएको छ । फेयरफ्याक्स काउन्टी पुलिस डिपार्टमेन्टले घटनाको २४ दिनपछि घटनालगत्तै घटनास्थलमा खटिएका प्रहरीको शरीरमा जडित बडी क्यामेरामा कैद गरिएको फुटेज स्थानीय समयअनुसार मार्च १९ मा अमेरिकी संचारमाध्यममार्फत सार्वजनिक गरेको हो ।
नेपालमा उदयपुर जिल्लाको बेलका नगरपालिका वडा नम्बर ९ बासिन्दा ५४ वर्षीय छत्र थापाले गत फेब्रुअरी २४ मा आफ्नी ५१ वर्षीया श्रीमती बिन्दा थापा र ३१ वर्षीया छोरी ममता थापाको हत्या गरेका थिए । उनले १० इन्च लामो धारिलो हतियार (दाउ) प्रहार गरेर आफ्नी श्रीमती र छोरीको हत्या गर्दैगर्दा प्रहरी पुगेपछि प्रहरीले घटनाका क्रममा बडी क्यामेराबाट कैद गरेको थियो । घटनाको क्रममा छत्रले आफ्नी श्रीमती बिन्दा र छोरी ममताको हत्या गरेपछि ज्वाँइ सन्तोष बस्नेतले रोक्ने कोशिस गर्दा उनीमाथि पनि दाउ प्रहार गरिएको थियो ।
प्रहरीको बडी क्यामेराले कैद गरेको फुटेजमा अपार्टमेन्ट रुम रक्ताम्य देखिन्छ । छत्रले श्रीमती बिन्दा र छोरी ममताको हत्या गरेपछि आफ्ना ज्वाँइ सन्तोषको हत्या प्रयास गर्दै घुँडा टेकेर उनीमाथि दाउ प्रहार गर्दै दाउ समाएर बसेको प्रहरीले सार्वजनिक गरेको फुटेजमा देखिन्छ । प्रहरीले आत्मसमर्पण गर्न पटकपटक आग्रह गर्दा पनि अटेर गरेर थप प्रहार गर्ने प्रयास गरेपछि एक प्रहरी अधिकारीले हत्या आरोपी छत्रमाथि पटकपटक गोली प्रहार गर्दा उनको घटनास्थलमै मृत्यु भएको थियो ।
अमेरिकामा नेपाली परिवारमा हत्याकाण्ड : श्रीमती र छोरीको हत्या, प्रहरी कारबाहीमा मारिए आरोपी
अमेरिकामा नेपाली परिवारमा हत्याकाण्ड : श्रीमती र छोरीको हत्या, प्रहरी कारबाहीमा मारिए आरोपी
प्रहरी घटनास्थलमा पुग्दा छोरी ममताको मृत्यु भइसकेको थियो । श्रीमती बिन्दा दुखाइको पीडाले चिच्याउँदै छट्पटाइरहेकी थिइन् । घटना हुँदै गर्दा सामुन्ने रुममा बस्ने महिलाले प्रहरीलाई खबर गरेकी थिइन् । ती महिलाले आफ्नो रुम अगाडिबाट चिट्चिहाटको आवाज आइरहेको र ठूलै घटना भएको हुनसक्ने भन्दै प्रहरीलाई आउन अनुरोध गरेको प्रहरीले फुटेजसँगै सार्वजनिक गरेको ९११ मा फोन गरको कल रेकर्डमा सुनिन्छ ।
घटनाक्रममा सन्तोष र ममताको १ वर्षीय छोरा अपार्टमेन्ट रुम भित्रै रहेको देखिन्छ । प्रहरीले रक्ताम्य रुमबाट बच्चालाई सकुशल उद्धार गरेको थियो । बच्चालाई चाइल्ड केयर सेन्टरमा राखिँदै आएको थियो । हाल ज्वाइँ सन्तोष उपचाररत छन् । फ्यरफ्याक्स प्रहरी डिपार्टमेन्टका प्रमुख केभिन डेभिसले घटनास्थलमै घटनाबारे सम्बोधन गर्दै प्रहरी पुग्न केही समय ढिलाइ भएको भए, सन्तोषको पनि मृत्यु हुनसक्ने बताएका थिए । उनले बच्चा सकुशल रहेकोसमेत पुष्टि गरेका थिए । प्रहरीको आदेशलाई पटकपटक अटेर गर्दा घटनास्थलमै हत्या आरोपी पुष्टि भएका छत्रलाई गोली प्रहार गर्न बाध्य भएको डेभिसले प्रतिक्रिया दिएका थिए ।
एक वर्षको अन्तरालमा अमेरिकामा नेपाली परिवारमा घटेको यो दोस्रो घटना हो । यसअघि गतवर्ष अगस्तमा टेक्सस राज्यको डालस सहरमा एक नेपाली पुरुषले आफ्नै श्रीमती र छोराको गोली प्रहार गरेर हत्यापछि एक पुरुषले आत्महत्या गरेका थिए । ५३ वर्षीय ललित प्रधानमा आफ्नी ३७ वर्षीया पत्नी रञ्जना श्रेष्ठ र तीन वर्षीय छोरा प्रनिश प्रधानलाई गोली प्रहार गरेर हत्या गरेका थिए । ललितले पत्नी र छोरालाई गोली हानी हत्या गरेपछि सोही पेस्तोल प्रयोग गरेर आफूमाथि गोली प्रहार गरी आत्महत्या गरेको प्रहरीले जनाएको थियो ।
