: प्रसिद्ध धार्मिक तथा पर्यटकीय स्थल गोसाइँकुण्ड भ्रमणका क्रममा लेक लागेर बिरामी परेका एक विदेशी पर्यटकको सकुशल उद्धार गरिएको छ। गोसाइँकुण्ड गाउँपालिका–५ स्थित होटल लेकसाइडमा बसेका थाइल्याण्डका नागरिक २७ जना बौद्ध भिक्षुको टोलीसँगै गोसाइँकुण्ड पुगेका २२ वर्षीय फ्रा सुखोन तोस्राक्सालाई उच्च हिमाली क्षेत्रमा हुने ‘हाई अल्टिच्युड सिकनेस’ का कारण स्वास्थ्यमा गम्भीर समस्या देखिएको थियो। उनलाई नेपाली सेनाको टोलीले सकुशल उद्दार गरेको हो।
हिमपातपछि उनमा श्वासप्रश्वासमा समस्या देखिएको थियो। घटनाको जानकारी प्राप्त हुनासाथ श्रीनाथ गण अन्तर्गतको चन्दनबारी सुरक्षा बेशबाट बिहान ८ बजे गएको सेनाको टोलीले उद्दार गरी उनलाई तत्काल चन्दनबारी ल्याएको थियो ।
चन्दनबारीस्थित लिटिल बुद्ध होटलमा प्रारम्भिक स्वास्थ्य परीक्षणपछि थप उपचारका लागि जिल्ला अस्पताल पुर्याइएको थियो। उनको जिल्ला अस्पताल रसुवामा उपचार भइरहेको छ।
