: बेलायती प्रधानमन्त्री किएर स्टार्मर र अमेरिकी राष्ट्रपति डोनाल्ड ट्रम्पबीच टेलिफोनमा कुराकानी भएको छ। डाउनिङ स्ट्रिटका प्रवक्ताका अनुसार दुवै नेताहरूले मध्यपूर्वको वर्तमान स्थितिका बारेमा छलफल गरेका छन्।
बिबिसी हिन्दीमा उल्लेख गरेअनुसार विशेषगरी विश्वव्यापी ढुवानीलाई पुन: सुचारु गर्नका लागि रणनीतिक रूपमा महत्त्वपूर्ण हर्मुज जलडमरूमध्य खोल्नुपर्ने आवश्यकतामा दुवै नेताले जोड दिएका छन्। प्रवक्ताका अनुसार, 'विश्वको ऊर्जा बजारमा स्थिरता सुनिश्चित गर्न हर्मुज जलमार्ग खुला हुनु अनिवार्य रहेको विषयमा दुवै नेता सहमत भएका छन्।'
अमेरिकी राष्ट्रपति ट्रम्पले हर्मुज जलमार्ग खोल्नका लागि इरानलाई नयाँ समय सीमा समेत दिएका छन्। उनले इरानसँग यो मार्ग पूर्ण रूपमा खोल्न अब '४८ घण्टा' मात्र बाँकी रहेको चेतावनी दिएका छन्। ट्रम्पको यो समय सीमा अनुसार अब इरानसँग केवल एक दिनको समय बाँकी छ।
राष्ट्रपति ट्रम्पले आफ्नो सामाजिक सञ्जाल 'ट्रुथ सोसल' मा एक पोस्ट गर्दै चेतावनी दिएका छन् कि यदि इरानले बिना शर्त हर्मुज जलडमरूमध्य खोल्दैन भने अमेरिकाले इरानका विद्युत् केन्द्रहरूलाई पूर्ण रूपमा ध्वस्त पारिदिनेछ। ट्रम्पको यस धम्कीपछि इरानले पनि प्रतिशोधपूर्ण कारबाही गर्ने चेतावनी दिएको छ।
