: अमेरिकी राष्ट्रपति डोनाल्ड ट्रम्पले इरानी नेतृत्वले अमेरिकासँग भइरहेको भित्री वार्तालाई सार्वजनिक रूपमा स्वीकार गर्न डराइरहेको दाबी गरेका छन्। एक चन्दा संकलन कार्यक्रम (फन्डरेजिङ डिनर) लाई सम्बोधन गर्दै ट्रम्पले इरानी अधिकारीहरूले अमेरिकासँग वार्ता भइरहेको तथ्य लुकाइरहेको टिप्पणी गरे।
बिबिसीका अनुसार ट्रम्पले इरानी नेताहरूको आधिकारिक भनाइलाई खण्डन गर्दै उनीहरू सम्झौताका लागि आतुर रहेको बताए। सम्बोधनका क्रममा उनले भने, 'इरानी नेताहरू जुनसुकै मूल्यमा पनि अमेरिकासँग सम्झौता गर्न चाहन्छन्, तर यो कुरा स्वीकार गर्न उनीहरूलाई डर छ।'
ट्रम्पले इरानी नेताहरूले वार्ताको कुरा लुकाउनुका पछाडि दुईवटा मुख्य कारण रहेको बताएका छन्। उनका अनुसार वार्ताको खबर सार्वजनिक भएमा आफ्नै जनताले विद्रोह गर्ने वा आक्रमण गर्ने उनीहरूको बुझाइ छ। त्यस्तै अर्काे कारण अमेरिकाले नै उनीहरूमाथि सैन्य कारबाही गर्ने हो कि भन्ने डरले पनि इरानी नेताहरू हच्किएका छन्।
इरानद्वारा अमेरिकी १५ बुँदे प्रस्ताव अस्वीकार
यसअघि अमेरिकाले मध्यपूर्वमा जारी तनाव कम गर्न र युद्धविरामका लागि १५ बुँदे प्रस्ताव अघि सारेको चर्चा चलेको थियो। तर, इरानले उक्त प्रस्तावलाई पूर्ण रूपमा अस्वीकार गरिदिएको छ।
इरानका विदेशमन्त्री अब्बास अरागचीले इरानी सरकारी टेलिभिजनलाई दिएको अन्तर्वार्तामा अमेरिकाको सर्तमा कुनै पनि सम्झौता नहुने स्पष्ट पारेका छन्। उनले भनेका छन्, 'इरानले युद्ध आफ्नै सर्तहरूमा मात्र अन्त्य गर्नेछ, अमेरिकाले दिएको योजनामा होइन।'
पछिल्लो समय इरान र अमेरिकाबीच प्रत्यक्ष वार्ता नभएको दाबी गरिए तापनि ट्रम्पको यो बयानले कूटनीतिक वृत्तमा नयाँ तरंग पैदा गरेको छ। एकातिर अमेरिका सम्झौताको दबाब दिइरहेको छ भने अर्कोतिर इरानले आफ्नै सर्तहरूलाई प्राथमिकता दिइरहेको देखिन्छ।
