: जेरुसेलम इजरायल डिफेन्स फोर्सेजले इरानको राजधानी तेहरानमा नयाँ सैन्य आक्रमण सुरु गरेको पुष्टि गरेको छ। इजरायली सेनाका अनुसार हमलाहरू तेहरानस्थित 'इरानी आतंकवादी शासन' सँग सम्बन्धित सैन्य पूर्वाधारहरूलाई नष्ट गर्ने उद्देश्यले गरिएका हुन्।
बीबीसीका अनुसार तेरहान सहरको पूर्वी, उत्तरी र मध्य भागहरूमा शक्तिशाली विष्फोटका आवाजहरू सुनिएका छन्। आईडीएफले आफ्नो आधिकारिक विज्ञप्तिमा इरानी शासनको रणनीतिक र सैन्य क्षमतालाई कमजोर बनाउन यी आक्रमणहरू केन्द्रित रहेको बताएको छ।
सामाजिक सञ्जाल र स्थानीय सञ्चारमाध्यमहरूमा सार्वजनिक भएका तस्विरहरूमा तेहरानका विभिन्न भवनहरू र सैन्य इलाकाहरूबाट बाक्लो धुवाँको मुस्लो निस्किरहेको देखिन्छ।
यो आक्रमण पछिल्लो समय मध्यपूर्वमा बढ्दै गएको तनावको एक हिस्सा मानिएको छ। इरानको तर्फबाट यस आक्रमणको प्रतिक्रिया र क्षतिको आधिकारिक विवरण आउन बाँकी छ।
