: मुस्लिम समुदायले साक्षरता दर बढाउन देशब्यापी अभियान सञ्चालन गर्ने भएको छ । जमीअत उलमा–ए नेपालले मुस्लिम समुदायका बालबालिकालाई शिक्षाको मूलधारमा ल्याउने उद्देश्यसहित देशव्यापी ‘शैक्षिक जागरण अभियान’ सञ्चालन गर्ने भएको हो ।
रौतहटको चन्द्रनिगाहपुरमा आयोजित पत्रकार सम्मेलनमार्फत संस्थाले २०८२ चैत १५ गतेदेखि २०८३ वैशाख १५ गतेसम्म अभियान सञ्चालन गर्ने निर्णय सार्वजनिक गरेको हो । संस्थाका केन्द्रीय अध्यक्ष मोहम्मद खालिद सिद्धकीले शिक्षा अभावका कारण मुस्लिम समुदाय मानव विकास सूचकांक, राजनीतिक पहुँच तथा आयआर्जनका क्षेत्रमा पछाडि परेको बताउँदै अभियानले शिक्षामा समान पहुँच विस्तार गर्दै समुदायको समग्र विकासमा टेवा पुग्ने विश्वास व्यक्त गरे ।
पत्रकार सम्मेलनमा प्रस्तुत राष्ट्रिय जनगणना २०७८ को तथ्याङ्कअनुसार नेपालको औसत साक्षरता दर ७६.२ प्रतिशत रहे पनि मुस्लिम समुदायको साक्षरता दर ६१.७ प्रतिशत मात्र रहेको छ । मुस्लिम महिलाको साक्षरता दर भने करिब ५० प्रतिशतमा सीमित रहेको तथ्याङ्कमा उल्लेख छ ।
संस्थाका सचिव मौलाना इजराइलले अभियानले शिक्षासम्बन्धी जनचेतना अभिवृद्धि, विद्यालय भर्ना दर वृद्धि, बीचैमा पढाइ छोड्ने दर न्यूनीकरण तथा शिक्षाको गुणस्तर सुधारमा सहयोग पुग्ने बताए । विशेष गरी मुस्लिम महिलाको साक्षरता दर बढाउन लक्षित कार्यक्रम आवश्यक भएकाले अभियान थालिएको उनले बताए ।
