: मध्यपूर्वमा सैन्य तनाव चरम सीमामा पुगेका बेला इरानले आफ्नो एउटा रणनीतिक टापु कब्जा गर्ने योजना बनिरहेको भन्दै छिमेकी क्षेत्रीय राष्ट्रहरूलाई कडा चेतावनी दिएको छ। इरानी संसदका सभामुख मोहम्मद बागेर घालिबाफले 'इरानका शत्रुहरू' ले कुनै क्षेत्रीय देशको सहयोगमा टापु कब्जा गर्ने प्रयास गरे त्यसको परिणाम भयानक हुने बताए ।
सभामुख घालिबाफले कुनै देशको नाम नतोकी चेतावनी दिँदै भने, 'यदि कुनै क्षेत्रीय राष्ट्रले शत्रुलाई सहयोग गरेमा इरानले त्यस देशको महत्त्वपूर्ण पूर्वाधारहरूमा निरन्तर र भीषण आक्रमण गर्नेछ।' इरानी सुरक्षा बलले शत्रुको हरेक गतिविधिलाई नजिकबाट नियालिरहेको समेत उनले उल्लेख गरे।
यो चेतावनी अमेरिकी राष्ट्रपति डोनाल्ड ट्रम्पले इरानसँग युद्ध अन्त्यका लागि वार्ता भइरहेको दाबी गरिरहेको समयमा आएको हो। तर, तेहरानले भने कुनै पनि वार्ता नभएको बताएकाे छ।
यसैबीच ह्वाइट हाउसकी प्रेस सचिव क्यारोलिन लेभिटले इरानलाई हार स्वीकार गर्न चेतावनी दिएकी छिन्। उनका अनुसार यदि इरानले वास्तविकता बुझ्न सकेन भने राष्ट्रपति ट्रम्पले इरानमाथि अहिलेसम्मकै कडा प्रहार हुनेछ। यसैबीच, अमेरिकी रक्षा मन्त्रालय (पेन्टागन) ले खाडी क्षेत्रमा करिब २,००० अमेरिकी प्याराट्रुपर्स र युद्धपोतहरू परिचालन गरिसकेको छ।
अन्तर्राष्ट्रिय सञ्चारमाध्यमहरूका अनुसार इरानको तेल निर्यातको मुख्य केन्द्र मानिने खर्ग टापुमा अमेरिकाको नजर रहेको आशंका गरिएको छ। इरानले यसमा संयुक्त अरब इमिरेट्स (UAE) ले सहयोग गर्न सक्ने सक्ने इरानको बुझाइ छ।
यदि इरानी भूमि वा टापुमा कुनै पनि सैन्य कारबाही भएमा इरानले लाल सागरको प्रवेशद्वार 'बाब अल-मन्डेब' जलडमरूमा नयाँ युद्ध मोर्चा खोल्ने र आवश्यक परेको खण्डमा शत्रुलाई सजाय दिन यमनका हुथी विद्रोहीहरूलाई परिचालन गर्ने तयारी गरेकाे छ ।
