— रुपन्देहीस्थित लुम्बिनी विकास कोष परिसरमा बिहीबार बिहान फैलिएको आगो निभाइएको छ । कोष परिसरमा रहेको वन क्षेत्रमा बिहान साढे १० बजे सल्किएको आगो तीन घण्टापछि निभाइएको हो । जसले गर्दा परिसरमा रहेका महत्त्वपूर्ण संरचना जोगिएका छन् ।
सशस्त्र प्रहरी बलको लुम्बिनी बेसका प्रमुख डीएसपी पंकज पौडेलका अनुसार बिहान साढे १० बजे सल्किएको आगोले तीन सय बिघा वन क्षेत्रमा नोक्सान पुगेको छ । परिसरमा रहेको अन्तर्राष्ट्रिय सम्मेलन केन्द्र नजिकै आगलागी भएको थियो । डीएसपी पौडेलले सम्पूर्ण सुरक्षा निकाय र स्थानीय सरोकारवालाको प्रयासले सम्मेलन केन्द्रसँगै पुस्तकालय र संग्रहालयमा क्षति हुनबाट जोगिएको बताए ।
उनका अनुसार आगो नियन्त्रणमा नेपाली सेना २५, सशस्त्र प्रहरी ३०, नेपाल प्रहरी १५, लुम्बिनी विकास कोषका १०, नगरपालिकाबाट १० जना आगो नियन्त्रणमा खटिएका थिए । आगो फैलिन नदिन जेसीभी प्रयोग गरेर बाटो बनाइएको डीएसपी पौडेलले बताए । उनका अनुसार एउटा दमकल र एम्बुलेन्ससमेत उपयोग गरिएको थियो । सबै निकायको संयुक्त प्रयासले आगो नियन्त्रण सम्भव भएको उनले बताए ।
