: अखिल नेपाल फुटबल संघ (एन्फा) को चैत १३ मा हुने चुनावमा पंकजविक्रम नेम्वाङका विपक्षी अध्यक्ष उम्मेदवार दीर्घबहादुर (कुमार) केसी पक्ष सहभागी नहुने भएको छ । काठमाडौंमा चुनावको एक दिनअघि पत्रकार सम्मेलन गर्दै कुमार पक्षले आफूहरु चुनावमा नजाने बताएका हुन् ।
‘हामी नेपाल सरकारको सम्बन्धित निकाय राष्ट्रिय खेलकुद परिषद (राखेप) ले निलम्बन गरेको संघको चुनावमा राष्ट्रको ऐन विपरित संलग्न हुँदैनौं ।’ दीर्घबहादुर (कुमार) केसीले अन्नपूर्ण पोष्टसँग कुरा गर्दै भनेका हुन् ।
उनीसँगै उनको प्यानलमा रहेका १८ जनालाई निर्वाचन समीति र सचिवालयले कुनै पनि खबर नगरेको समेत केसीले बताए । ‘भोलि चुनाव हुँदैछ । झापामा भनेको छ । झापा कहाँ जाने हामीलाई निर्वाचन समितिले केही खबर गरेको छैन’, उनले भने । एन्फाको हुन लागेको चुनावको भेन्यू समेत विपक्षी प्यानललाई थाहा नदिई चुनाव गराउन लागिएको उनले आरोप लगाए ।
उनले भने, ‘यो त सरकारको ऐन पनि नमान्ने विपक्षीलाई भेन्यू समेत थाहा नदिइ लुकेर गर्न लागिएको चुनाव हो ।’ नेपाल सरकारको सम्बन्धित निकाय राखेपले बुधबार एक पत्र मार्फत एन्फालाई ३ महिनाको लागि निलम्बन गरिएको बताएको थियो । राखेपले निलम्बनको पत्र पठाए पनि हालका अध्यक्ष पकंज विक्रम नेम्वाङ पक्ष भने झापामा संघीय चुनावी साधारण सभाको लागि पुगेको छ ।
