: मध्यपूर्वमा जारी युद्धमा नयाँ र गम्भिर मोड आएको छ। इरान समर्थित यमनी विद्रोही समूह हुथीले पहिलो पटक इजरायलमाथि ब्यालिस्टिक मिसाइल प्रहार गरेको आधिकारिक घोषणा गरेको छ। यो आक्रमणसँगै हुथी विद्रोहीहरू अब औपचारिक रूपमा इजरायल र इरानबीचको युद्धमा सामेल भएका छन्।
शनिबार बिहान हुथी समूहका सैन्य प्रवक्ता याह्या सारीले एक टेलिभिजन सम्बोधनमार्फत इजरायलको दक्षिणी क्षेत्रमा रहेका 'संवेदनशील सैन्य अखडा' हरूलाई लक्षित गरी मिसाइल प्रहार गरिएको जानकारी दिएका हुन्। इजरायली रक्षा बलले पनि यमनबाट आएको मिसाइल पत्ता लागेको र त्यसलाई आकाशमै निष्क्रिय पारिएको पुष्टि गरेको छ। नेगेभ मरुभूमि र बियर शेवा क्षेत्रमा साइरनहरू बजाइएकाे अन्तराष्ट्रिय समाचार संस्था सिएनएन जनाएकाे छ ।
हुथीहरूका अनुसार यो कारबाही प्यालेस्टाइन, लेबनान, इराक र इरानमाथि इजरायलले गरिरहेको सैन्य आक्रमण र नरसंहारको जवाफ हो। यदि इजरायल र अमेरिकाले आक्रमण नरोकेमा उनीहरूले आफ्नो सैन्य कारबाही अझ सशक्त बनाउने चेतावनी दिएका छन् । हुथीहरूले विश्वको प्रमुख व्यापारिक मार्ग 'बाब अल-मन्डाब जलसन्धि' बन्द गर्ने संकेत दिएका छन्। यदि यो मार्ग बन्द भएमा विश्वभरको इन्धन र सामान ढुवानीमा ठूलो असर पर्नेछ र महँगी बढ्ने खतरा छ।
