: प्रधानमन्त्री कप राष्ट्रिय एक दिवसीय क्रिकेट प्रतियोगिता २०२६ अन्तर्गत गण्डकी प्रदेशले विभागीय क्लब एपीएफलाई ४३ रनले पराजित गरेको छ । गण्डकी प्रदेशले प्रतियोगितामा चौंथो खेल खेल्दा पहिलो जित दर्ता गरेको हो ।
समान ४ खेल खेलेको एपीएफको भने यो दोस्रो हार हो । तल्लो मूलपानी मैदानमा भएको खेल २१ ओभरमा घटाएर गराइएको थियो । जसमा टस जितेको गण्डकीले निर्धारित २१ ओभरमा ७ विकेट गुमाउँदै १५० रन बनायो । गण्डकीले दिएको १५१ रनको विजयी लक्ष्य पछ्याएको एपीएफ १८.३ ओभरमा १०७ रन बनाउँदै अलआउट भयो ।
एपीएफका लागि सुमित महर्जनले सर्वाधिक २२ रन बनाए । उनले २४ बलमा १ छक्का प्रहार गरे । ओपनरद्वय लोकेश बम र आसिफ शेखले समान १४-१४ रन बनाउँदै पेभेलियन फर्किए । कप्तान रोहित पौडेल ३ रनमा क्याच भए । कमलसिंह ऐरी १७ रनमा बोल्ड भए । अभिषेक गौतम १४ रनमा अविजित रहे । अपराजित पौडेल र सिविन श्रेष्ठले ३–३ विकेट लिए । सुवास भण्डारीले २ विकेट लिँदा कमल परियारले १ विकेट लिए ।
त्यसअघि, ब्याटिङ गरेको गण्डकीको लागि ओपनर ब्याटर गौरव विकले सर्वाधिक ३७ रन बनाए । उनले ३६ बलमा ३ चौका र २ छक्का प्रहार गरे । अर्का ओपनर अर्जुन कुमालले २५ रन बनाए । दिपक डुम्रेले ३४ रन बनाए । दिनेश बुढा ऐरले १९ रजन बनाउँदा कप्तान विपिन खत्री २० रनमा अविजित रहे । एपीएफका लागि अभिनाश बोहोराले सर्वाधिक ३ विकेट लिए । कमल सिंह ऐरी, युवराज खत्री र अभिषेक गौतमले १–१ विकेट लिए ।
गण्डकी प्रदेशको पहिलो खेल नेपाल पुलिस क्लबसँग वर्षाको कारण स्थगित बन्दा अंक बाँडेको थियो । त्यसपछि भने दोस्रो खेलमा त्रिभुवन आर्मीसँग ७ विकेट र तेस्रो खेलमा बामगती प्रदेशसँग १७० रनले पराजित भएको थियो । एपीएफ क्लबले पनि पहिलो खेलमा बागमती प्रदेशसँग अंक बाँडेको थियो । दोस्रो खेलमा नेपाल पुलिस क्लबसँग १८५ रनको फराकिलो हार बेहोरेको एपीएफले तेस्रो देलमा बागमती प्रदेशलाई ७१ रनले हराएको थियो ।
