: साउदी अरबको प्रिन्स सुल्तान एयर बेसमा इरानले गरेको क्षेप्यास्त्र र ड्रोन आक्रमणमा अमेरिकी वायुसेनाको अत्यन्त महत्वपूर्ण ई-३ सेन्ट्री विमान ध्वस्त भएको छ। 'अवाक्स' प्रणालीबाट सुसज्जित यो विमानलाई अमेरिकी सैन्य सञ्चालनको मेरुदण्ड मानिन्छ।
उक्त घटनाबारे अन्तराष्ट्रिय सञ्चारमाध्यम सीएनएनले भग्नावशेषका तस्विरहरूलाई भू-उपग्रह (स्याटेलाइट) तस्विरहरूसँग तुलना गरेर पुष्टि गरेको छ। मार्च ११ को स्याटेलाइट तस्विरमा देखिएको स्थानमै अहिले विमानको जलेको अवशेष र यसको विशिष्ट पहिचान मानिने 'रोटेटिङ राडार डोम' भुईँमा खसेको अवस्थामा देखिएको छ।
यस आक्रमणमा परी कम्तीमा १० जना अमेरिकी सैनिक घाइते भएका छन्। यद्यपि, कुनै मानवीय क्षतिको खबर भने प्राप्त भएको छैन। आक्रमणमा वायुसेनाको एउटा ट्याङ्कर विमानमा पनि क्षति पुगेको स्रोतले जनाएको छ।
सेन्ट्री विमान केवल एउटा जहाज मात्र नभई आकाशमा उड्ने एक शक्तिशाली कमान्ड सेन्टर हो। यसले करिब १,२०,००० वर्ग माइलको युद्धक्षेत्रमा एकैसाथ निगरानी राख्न सक्छ।साथै यसले एकै पटकमा करिब ६०० वटा शत्रु वा मित्र शक्तिहरूका लक्ष्यहरूलाई ट्र्याक गर्न सक्छ।
विमानको माथि रहेको ३० फिट व्यासको राडार डोमले जमिनदेखि समताप मण्डल सम्म २५० माइलको दुरीसम्म स्पष्ट दृश्य प्रदान गर्छ। यस विमानमा रहेका टोलीले कमाण्डरहरूलाई शत्रु र मित्र शक्ति कहाँ छन् भन्ने सटीक जानकारी दिई आक्रमण र रक्षाको निर्देशन दिने गर्छन्।
विगत केही दशकदेखि अमेरिकी सैन्य रणनीतिको मुख्य हिस्सा रहेको यो विमान ध्वस्त हुनुलाई ठुलो रणनीतिक क्षतिका रूपमा हेरिएको छ। विशेष गरी मध्यपूर्वमा जारी तनावका बीच यस्तो अत्याधुनिक प्रणाली गुमाउँदा युद्धक्षेत्रको व्यवस्थापनमा चुनौती थपिन सक्ने रक्षा विज्ञहरूले बताएका छन्।
