: अमेरिकाले इरानको रणनीतिक रूपमा महत्त्वपूर्ण सहर इसफाहानमा रहेको एक प्रमुख आणविक केन्द्र र सैन्य डिपोमा शक्तिशाली आक्रमण गरेको छ। 'द वाल स्ट्रिट जर्नल' को रिपोर्टअनुसार, सोमबार राति गरिएको यस आक्रमणमा जमिनमुनिका मजबुत संरचना ध्वस्त पार्न सक्ने २,००० पाउन्ड (करिब ९०७ किलोग्राम) का 'बन्कर–बस्टर' बमहरू प्रयोग गरिएको छ।
अमेरिकी अधिकारीहरूलाई उद्धृत गर्दै प्रकाशित रिपोर्टअनुसार, इसफाहानस्थित ठूलो मात्रामा हतियार र सैन्य उपकरण भण्डारण गरिएको डिपोलाई मुख्य निशाना बनाइएको थियो। 'पेनिट्रेटर म्युनिसन' भनिने यी बन्कर–बस्टर बमहरू जमिनको धेरै गहिराइसम्म पुगेर विस्फोट हुने गरी डिजाइन गरिएका हुन्छन्। आक्रमणपछि उक्त डिपोमा रहेका गोला–बारुदहरू शृङ्खलाबद्ध रूपमा विस्फोट हुँदा सो क्षेत्रमा भीषण आगलागी भएको छ।
आक्रमणको लगत्तै अमेरिकी राष्ट्रपति डोनाल्ड ट्रम्पले सामाजिक सञ्जालमा एउटा भिडियो सार्वजनिक गरेका छन्। उक्त भिडियोमा रातको समयमा भएका शक्तिशाली विस्फोट र आकाश छुने गरी उठेको आगोको लप्का प्रष्ट देखिन्छ। मिडिया रिपोर्टहरूका अनुसार यो भिडियो इसफाहानकै गोला–बारुद डिपोमा भएको हमलाको हो। करिब २३ लाख जनसङ्ख्या भएको यस सहरमा 'बद्र एयरबेस' समेत रहेको छ, जुन इरानी सैन्य दृष्टिकोणले निकै संवेदनशील र महत्त्वपूर्ण मानिन्छ।
मध्यपूर्वको यो युद्ध दोस्रो महिनामा प्रवेश गरिरहँदा यस पछिल्लो आक्रमणले विश्वव्यापी चिन्ता बढाएको छ। शक्तिशाली बम प्रहार र त्यसपछिका शृङ्खलाबद्ध विस्फोटका कारण उक्त क्षेत्रमा ठूलो भौतिक क्षतिको आशङ्का गरिएको छ।
यसैबीच, बिग्रँदो स्थिति र सम्भावित क्षेत्रीय महायुद्धलाई रोक्न कूटनीतिक प्रयासहरू पनि सुरु भएका छन्। पाकिस्तान, इजिप्ट, साउदी अरब र टर्की लगायतका देशहरूले आपतकालीन बैठक आह्वान गर्दै संकट समाधान र शान्ति स्थापनाका लागि दबाब दिइरहेका छन्।
