: एएफसी एसियन कप छनोटको अन्तिम खेलमा नेपाल लाओसँग १-० ले पराजित भएको छ।
मंगलबार लाओसको राष्ट्रिय रंगशालामा भएको खेलमा लाओसका कप्तान बोउनफचान बोउनकोङले गरेको गोल नै निर्णायक सावित भयो। खेलको पहिलो हाफ गोलरहित बराबरीमा सकिएको थियो। दोस्रो हाफको ४८ औं मिनेटमा कप्तान बोउनफचानले गोल गरेका थिए।
४०औं मिनेटमा मनिष डाँगीले पोस्ट नजिकैबाट गरेको प्रहार बाहिरिदा नेपालले अग्रता लिने अवसर गुमाएको थियो। निर्धारित समयको ३ मिनेट अगाडि नेपालले गरेको प्रहार लाओसका खेलाडीले गोल लाइनबाटै बचाउँदा नेपालले बराबरी गोल फर्काउन सकेन।
नेपालका लागि यही खेल मार्फत फरवार्ड युवराज खड्का र मिडफिल्डर पेम्बा दोर्जे लामाले नेपालको लागि अन्तर्राष्ट्रिय डेब्यू गरेका छन्। युवराजले पहिलो रोजाइमा मौका पाउँदै डेब्यु गरेका हुन् भने पेम्बाले दोस्रो हाफमा दिपेश गुरुङलाई प्रतिस्थापन गर्दै नेपाली राष्ट्रिय टिममा डेब्यु गरेका हुन्
नेपाल यसअघि नै एएफसी एसियन कप छनोट चरणबाट बाहिरिसकेको छ। यो नेपालको अन्तिम खेल थियो। समूह ‘एफ'मा रहेको नेपालले ६ खेल खेल्दा ३ अंक जोड्दै समूहको पुछारमा रहँदै प्रतियोगिता अन्त्य गरेको हो।
