: श्रम, रोजगार तथा सामाजिक सुरक्षा मन्त्रालय अन्तर्गतको वैदेशिक रोजगार विभागले रोजगारीका लागि विदेशिने श्रमिकलाई दिइने अभिमुखीकरण तालिम शुल्क बढी नलिन स्पष्ट पारेको छ । विभागले एक सूचना जारी गर्दै अभिमुखीकरण तालिमका लागि प्रतिप्रशिक्षार्थी शुल्क ७ सय रूपैयाँ नै रहेको स्पष्ट पारेको छ ।
पछिल्लो समय अभिमुखीकरण प्रदायक संस्थाहरूले २ हजार १ सय रूपैयाँ लिने गरेका छन् । ७ सय भन्दा बढी शुल्क नबढेको प्रष्ट पार्दै विभागले त्यो भन्दा बढी लिएको भए उजुरी गर्न आग्रह समेत गरेको छ । अभिमुखीकरण तालिम अनिवार्य रूपमा दुई दिन सञ्चालन हुने र सो अवधिभरको कूल शुल्क ७०० रुपैयाँ नै हुने विभागले प्रष्ट पारेको छ ।
२०८१ असोज १३ गते जारी गरिएको प्रेस विज्ञप्तिमार्फत उक्त शुल्क नै कायम रहेको प्रष्ट पार्दै त्योभन्दा बढी शुल्क लिने व्यवसायीको अनुमति (इजाजत पत्र) स्वतः रद्द गरिने चेतावनी दिइएको छ । वैदेशिक रोजगार ऐन २०६४ तथा कार्यविधिअनुसार नै तालिमका सबै मापदण्ड लागु हुने विभागले स्पष्ट पारेको छ ।
