: प्रधानमन्त्री कप पुरुष राष्ट्रिय क्रिकेट प्रतियोगिता अन्तर्गत बुधबार बागमतीले कर्णाली प्रदेशमाथि ६० रनको जित हात पारेको छ । जनकपुरधामस्थित रामजानकी मैदानमा आफूले प्रस्तुत गरेको १८१ रनको लक्ष्य पछ्याएको कर्णालीलाई १२० रनमा रोक्दै बागमतीले जित निकालेको हो।
बागमतीको जितमा कप्तान सन्दीप लामिछाने नायक सावित भए । कर्णालीविरुद्ध ९.१ ओभर बलिङ गरेका सन्दीपले ४० रन खर्चिएर महत्वपूर्ण सात विकेट चट्काए । सन्दीपले सुनिल धमला, निश्चल रावल, विपिन शाही, अर्जुन घर्ती, दीपेन्द्र रावत, दिनेश अधिकारी र दिवन पुनको विकेट लिए ।
बागमतीका रिजन ढकाल, प्रतिश जिसी र सुवास खत्रीले एक-एक विकेट हात पारे । कर्णालीका निश्चल रावलले सर्वाधिक ३१ रन बनाए । यसैगरी दिनेश अधिकारीले २२, विपिन शाहीले १५, सुनिल धमलाले १४ र दिवन पुनले १० रन जोडे ।
यसअघि टस हारेर ब्याटिङ गरेको बागमतीले ३८.४ ओभरमा सबै विकेट गुमाएर एक सय ८० रन बनाएको थियो । बागमतीका लागि विवेक मगरले अर्धशतकीय पारी खेले । ५६ रन बनाएका विवेकले ८० बलमा दुई चौका र चार छक्का प्रहार गरे । यसैगरी बागमतीका लागि इशान पाण्डेले २७, पवन थापाले २२, शुभ कंसकारले २० र शिभम तिवारीले १८ रन जोडे ।
कप्तान सन्दीप लामिछानेले दुई रनमा रनआउट हुन पुगे । बागमतीका अन्य ब्याटरले दोहोरो अंकमा रन जोड्न सकेनन् । कर्णालीका कप्तान दिवन पुनले तीन विकेट लिए । यसैगरी प्रकाश जैसी, दीपेन्द्र रावत र निश्चल रावले समान दुई-दुई विकेट हात पारे । जितसँगै बागमती अंक तालिकाको छैठौं स्थानमा उक्लिएको छ । प्रतियोगितामा पाँच खेल खेलेको बागमतीले दुई खेलमा जित हात पार्दा अन्य तीन खेलमा हार व्यहोरेको छ ।
पहिलो खेलमा एपीएफसंग ७१ रनले हारेको बागमतीले दोस्रो खेलमा गण्डकीलाई एक सय ७० रनले हराएको थियो । तेस्रो खेलमा पुलिससंग सात विकेटले पराजय भोगेको बागमती चौथो खेलमा आर्मीसँग तीन विकेटले पराजित हुन पुगेको थियो । यसअघिका सबै खेल काठमाडौंको मुलपानी मैदानमा खेलेको बागमतीले पहिलो पटक मधेसको मैदानमा खेलेको हो ।
यता समान पाँच खेल खेलेको कर्णाली अंकतालिकाको आठौं स्थानमा छ । पहिलो खेलमा बर्षा बाधक बनेपछि लुम्बिनीसँग अंक बाँडेको कर्णाली दोस्रो खेलमा सुदूरपश्चिमसँग चार विकेटले पराजित भएको थियो । यसैगरी तेस्रो खेलमा कोशीलाई १६ रनले हराएको कर्णालीले चौथो खेलमा भने मधेससँग पाँच विकेटको पराजय व्यहोरेको थियो ।
प्रतियोगिता अन्तर्गत बिहीबार जनकपुरस्थित रामजानकी क्रिकेट मैदानमा मधेस प्रदेश र त्रिभूवन आर्मी क्लब भिड्नेछन् भने वीरगन्जस्थित नारायणी क्रिकेट मैदानमा गण्डकी र सुदूरपश्चिमबीच खेल हुनेछ । नेपाल क्रिकेट संघ (क्यान) को आयोजनामा चैत ७ गतेदेखि जारी प्रतियोगितामा सात वटा प्रदेश र तीन वटा विभागीय गरी १० टोलीको सहभागिता रहेको छ । प्रतियोगिताको विजेताले १० लाख र उपविजेताले पाँच लाख नगद प्राप्त गर्नेछ । प्रतियोगिताको शीर्ष चार टोली जय ट्रफीका लागि छनौट हुनेछन् ।
