: इराकको राजधानी बगदादबाट एक अमेरिकी स्वतन्त्र पत्रकार शेली किटल्सन अपहरणमा परेकी छिन् । उनलाई इरान समर्थित मिलिसिया कताइब हिजबुल्लाहले अपहरण गरेको इराकी र अमेरिकी अधिकारीहरूले बताएका छन् । उनलाई मंगलबार साँझ अपहरण गरिएको हो । किट्लेसनले अल–मोनिटर नामक समाचार संस्थाका लागि लेख लेख्दै आएकी थिइन् ।
सुरक्षा बलहरूले अपहरणकारीहरूलाई पछ्याउने क्रममा उनीहरूको एउटा गाडी पल्टिएको र एक संदिग्ध पक्राउ परेको इराकको आन्तरिक मन्त्रालयले जनाएको छ । इरान समर्थित मिलिसिया समूहसँग सम्बन्धित एक व्यक्तिलाई इराकी अधिकारीहरूले पक्राउ गरेको अमेरिकी विदेश मन्त्रालयका एक अधिकारीले बताएका छन् ।
अमेरिकी विदेश मन्त्रालयका ग्लोबल पब्लिक अफेयर्सका सहायक सचिव डिलन जोन्सनले एक अमेरिकी पत्रकार अपहरणमा परेको पुष्टि गरेका छन्, तर किट्ल्सनको नाम स्पष्ट रूपमा उल्लेख गरेका छैनन् । उनले एक्स (ट्विटर) मा लेखेका छन्, ‘विदेश मन्त्रालयले उनलाई पहिले नै सम्भावित खतराबारे चेतावनी दिएको थियो र हामी उनलाई सकेसम्म छिटो सुरक्षित रूपमा मुक्त गराउन समन्वय जारी राखेका छौं ।’
