। अमेलिया केरले शानदार ब्याटिङ गर्दै १३९ बलमा अविजित १७९ रन बनाएपछि न्युजिल्यान्ड महिला क्रिकेट टोलिले दक्षिण अफ्रिकाविरुद्ध ऐतिहासिक जित हात पारेको छ।
बेसिन रिजर्भमा बुधबार भएको एकदिवसीय खेलमा न्युजिल्यान्डले ३४७ रनको विशाल लक्ष्य पछ्याउँदै २ विकेटले जित निकालेको हो। यो महिला एकदिवसीय क्रिकेट इतिहासकै सबैभन्दा ठूलो सफल रन चेज हो।
जितको नायक केरले १३९ बलमा अविजित १७९ रन बनाएर टोलीलाई जित दिलाइन्। उनले आफ्नो पाँचौं एकदिवसीय शतक पनि पूरा गरिन्।
न्युजिल्यान्डको सुरुआत भने राम्रो थिएन। सुरुमै महत्वपूर्ण विकेट गुमाएको टोली मध्यम चरणसम्म ४ विकेट गुमाएर दबाबमा परेको थियो। तर त्यसपछि अमेलियाले इसाबेला गेजसँग मिलेर १२० रनको साझेदारी गर्दै खेलमा फर्काइन्। गेजले ६८ रन बनाइन्।
अन्त्यतिर अमेलियाले आक्रामक खेल देखाउँदै अन्तिम २ बल बाँकी रहँदा टोलीलाई लक्ष्यसम्म पुर्याइन्।
यसअघि पहिले ब्याटिङ गरेको दक्षिण अफ्रिकाले ६ विकेट गुमाएर ३४६ रन बनाएको थियो। टोलीका लागि एनेके बोशले ९१ रन, लाउरा वोल्भार्डले ६९ रन र कोल ट्रायनले अविजित ५२ रन बनाइन्।
अमेलिया केरको उत्कृष्ट प्रदर्शनका कारण दक्षिण अफ्रिकाको ठूलो स्कोर पर्याप्त हुन सकेन र न्युजिल्यान्डले रोमाञ्चक जित निकाल्यो।
