। जगदुल्ला ‘ए’ जलविद्युत् आयोजनाबाट उत्पादन हुने १२४.३५ मेगावाट विद्युत् ४०० केभी प्रसारण लाइनमा जडान गर्ने सम्बन्धी सहमति भएको छ ।
जगदुल्ला हाइड्रोपावर कम्पनी लिमिटेड र राष्ट्रिय प्रसारण ग्रिड कम्पनी लिमिटेड बिच जगदुल्ला–ए जलविद्युत आयोजनाबाट उत्पादन हुने १२४.३५ मेगावाट विद्युत् निकासीका लागि सहमति भएको आयोजनाका प्रमुख कार्यकारी अधिकृत सञ्जय सापकोटाले जानकारी दिए ।
डोल्पा र जाजरकोटको सीमा क्षेत्र मुड्केचुला गाउँपालिका–४ डोल्पा र नलगाड नगरपालिका–१३ क्षेत्रमा उक्त आयोजना निर्माण हुनेछ । सुरुमा आयोजनालाई ८२.३ मेगावाट क्षमतामा निर्माण गर्ने प्रस्ताव गरिए पनि पछि आयोजनाको क्षमता बढाएर १२४.३५ मेगावाट क्षमतामा निर्माण गर्न लागिएको उनले जानकारी दिए ।
कम्पनीले यो आयोजनालाई पिकिङ रन अफ द रिभर प्रकृतिमा विकास गर्न लागेको छ । कम्पनीका अनुसार, हालसम्म आयोजनाको निर्माणपूर्व गर्नुपर्ने सम्भाव्यता अध्ययन र विस्तृत इन्जिनियरिङ अध्ययनलगायत पूर्वतयारीका काम पुरा भएको छ । वातावरणीय अध्ययन प्रतिवेदन स्वीकृतको चरणमा रहेको छ । २५ अर्ब ऋण व्यवस्थापन भइरहेको छ ।
एनईए इन्जिनियरिङ कम्पनीले विस्तृत अध्ययन गर्न सन् २०२० डिसेम्बरमा कम्पनीसँग सम्झौता गरेको थियो । विस्तृत अध्ययन प्रतिवेदन (डीपीआर) लगायतका काम सकेर आगामी आर्थिक वर्ष २०८३/०८४ देखि आयोजनालाई निर्माणको चरणमा लैजाने गरी काम भइरहेको कम्पनीले जनाएको छ ।
कुल ७ किलोमिटरको सुरुङमार्गमार्फत जगदुल्ला जलविद्युत् आयोजनाको विद्युत् उत्पादन भई निस्कने पानीलाई सिधै डाइभर्सन बनाएर नलगाड नगरपालिका–१३ स्थित दामाचौर भन्ने ठाउँमा पुर्याएर विद्युत् उत्पादन गरिनेछ ।
आयोजनाबाट उत्पादन हुने बिजुली १३२ केभी क्षमताको प्रसारण लाइन निर्माण गरी नलगाडको दानीपिपलमा रहेको ४०० केभी प्रसारण लाइनको सबस्टेसनमा लगेर जोड्ने योजना छ ।
कुल ४ वर्षभित्र निर्माण सम्पन्न गरेर आयोजनाबाट व्यावसायिक विद्युत् उत्पादन गर्ने लक्ष्य राखिएको छ ।
४०० केभी प्रसारण लाइन निर्माण हुने
भेरी कोरिडोर भित्र रहेको विद्युतलाई केन्द्रीय प्रसारण लाइनमा जोड्नका लागि ४०० केभी प्रसारण लाइन निर्माण हुने छ । सुर्खेतको भेरीगंगा नगरपालिका–८ मैनतडा र जाजरकोटको नलगाड नगरपालिका–७ दानी पिपलमा प्रसारण लाइन निर्माण हुने भएको हो ।
करिब ७५ किलोमिटर लम्बाइ रहेको प्रसारण लाइन निर्माण गर्नका लागि अर्थ मन्त्रालयसँग छलफल भइरहेको राष्ट्रिय प्रसारण ग्रिड कम्पनी लिमिटेडका प्रमुख कार्यकारी अधिकृत सागर श्रेष्ठले बताए । हाल मैनतडा र दानी पिपलमा जग्गा अधिग्रहणको काम पुरा भइसकेको छ । करिब ८ अर्बमा प्रसारण लाइन निर्माण हुने अनुमान छ ।
त्यस्तै ६ अर्ब रुपैयाँमा दानी पिपल र मैनतडामा सबस्टेसन निर्माण गर्न लागिएको उनले जानकारी दिए ।
दानी पिपल लगायतका सबस्टेसन निर्माण कार्य सुरु गरेको ४ वर्षभित्र पूरा गर्ने लक्ष्य छ । सुरुको नलगाड सबस्टेसन दानी पीपल र अन्तिम बिन्दु सुर्खेतको मैनतडा सबस्टेसनमा रहने छ ।
सन् २०२३ डिसेम्बरबाट निर्माण थालेर सन् २०२७ नोभेम्बरमा सक्ने लक्ष्य भए पनि आर्थिक व्यवस्थापनको काम नहुँदा ढिला भएको आयोजनाले जनाएको छ ।
