अमेरिकी राष्ट्रपति डोनाल्ड ट्रम्पले इरानका नयाँ राष्ट्रपतिले युद्धविरामको माग गरेको दाबी गरेका छन् । सामाजिक सञ्जाल ट्रुथ सोसलमा पोस्ट गर्दै उनले यस्तो दाबी गरेका हुन्।
‘इरानका नयाँ राष्ट्रपति अघिल्लो राष्ट्रपतिभन्दा कम कट्टरपन्थी र बढी समझदार छन् । उनले भर्खरै अमेरिकालाई युद्ध अन्त्य गर्न आह्वान गरेका छन्,’ ट्रम्पले ट्रुथ सोसियलमा लेखेका छन् ।
उनले अगाडि लेखेका छन्, ‘हामी यसबारे तब मात्र विचार गर्नेछौं जब होर्मुजको जलडमरूम खोलिन्छ । र, पूर्ण रूपमा स्वतन्त्र र सुरक्षित हुन्छ । जबसम्म त्यो हुँदैन, हामी इरानलाई पूर्ण रूपमा ध्वस्त पार्नेछौं वा तिनीहरूलाई ‘पाषाण युग’ मा फिर्ता पठाउनेछौं ।’
ट्रम्पलाई युद्धविरामका लागि कसले गरे अपिल?
ट्रम्पले इरानका नयाँ राष्ट्रपतिले युद्धविरामको अनुरोध गरेको दाबी गरेका छन् । उनले नयाँ राष्ट्रपति भनेर कसलाई संकेत गरिरहेका छन् भन्ने कुरा स्पष्ट छैन ।
अमेरिका र इजरायलले २८ फेब्रुअरीमा इरानमा हवाई आक्रमण सुरु गरेदेखि सर्वोच्च नेता अयातोल्लाह अली खामेनी सहित धेरै वरिष्ठ इरानी नेताहरू मारिएका छन् ।
८ मार्चमा अली खामेनीका छोरा मोज्तबा खामेनी उनको उत्तराधिकारी बनेका छन् ।
त्यसबेलादेखि उनले धेरै लिखित वक्तव्यहरू जारी गरेका छन् तर सार्वजनिक रूपमा देखा परेका छैनन् । ट्रम्प आफैंले भनेका छन् कि मोज्तबा खामेनी जीवित छन् कि छैनन् भन्ने कुरा उनैलाई थाहा छैन ।
इरानमा सन् २०२४ मा निर्वाचित मसुद पेजेश्कियान नै राष्ट्रपति छन् । ट्रम्पले भने जस्तो अहिले नयाँ राष्ट्रपति छैनन् ।
इरानी मिडियाका अनुसार उनले मंगलबार मात्रै सार्वजनिक उपस्थिति जनाएका थिए । जहाँ उनले इरानसँग युद्ध अन्त्य गर्न ‘आवश्यक इच्छाशक्ति’ रहेको बताएका थिए ।
इरानले युद्ध अन्त्य गर्न वार्तामा संलग्न रहेको ट्रम्पको दाबीलाई निरन्तर अस्वीकार गर्दै आएको छ। मध्यस्थकर्ताहरू मार्फत अमेरिकासँग केही सन्देशहरू मात्र आदानप्रदान भएको इरानले बताएको छ।
