। चीनको बेइजिङस्थित नेपाली दूतावासमा २६३ औं नेपाली सेना दिवस मनाइएको छ । सेना दिवसको अवसर पारेर बिहीबार साँझ विशेष कार्यक्रम पनि आयोजना गरिएको थियो ।
कार्यक्रममा जनमुक्ति सेना सैन्य विज्ञान प्रतिष्ठानअन्तर्गत युद्ध अध्ययन संस्थानका उप–डिन मेजर जनरल नी सोंगलाई प्रमुख अतिथिका रूपमा सहभागी भएका थिए ।
कार्यक्रममा कार्यवाहक राजदूत श्रीमती रोशन खनालले नेपाली सेनाले राष्ट्रिय सार्वभौमिकताको रक्षा मात्र नभई पूर्वाधार विकास, विपद् व्यवस्थापन, उद्धार तथा राहत कार्य र सामाजिक सेवामा महत्वपूर्ण योगदान पुर्याउँदै आएको बताइन् ।
उनले संयुक्त राष्ट्रसंघीय शान्ति स्थापना मिसनमा नेपाली सेनाको सक्रिय भूमिकाका कारण विश्वस्तरमा शान्ति र सुरक्षाको प्रवर्द्धकका रूपमा नेपालले पहिचान बनाएको उल्लेख गरिन् । यस्तै नेपाल–चीनबीचको सैन्य सहकार्य मित्रता, पारस्परिक सम्मान र साझा समृद्धिमा आधारित रहेकोमा उनले जोड दिइन् ।
सैनिक सहचारी कर्णेल जयन्द्र केसीले नेपाली सेना दिवसले देशको सार्वभौमिकता, एकता र भौगोलिक अखण्डताको रक्षा गर्न पुस्तौँदेखि समर्पित सैनिकहरूको साहस, बलिदान र प्रतिबद्धताको सम्मान गर्ने अवसर प्रदान गर्ने बताए ।
उनले नेपाल विश्वमा दोस्रो ठूलो सैनिक योगदान गर्ने राष्ट्रका रूपमा अन्तर्राष्ट्रिय शान्ति स्थापना र बहुपक्षीयतामा महत्वपूर्ण भूमिका निर्वाह गरिरहेको उल्लेख गरे । साथै, संयुक्त अभ्यास, तालिम, क्षमता अभिवृद्धि तथा विपद् उद्धारजस्ता क्षेत्रमा नेपाल–चीन सैन्य सहकार्य अझ सुदृढ गर्नुपर्ने आवश्यकता औल्याए ।
कार्यक्रममा करिब १५० जना सहभागी भएका थिए, जसमा चिनियाँ जनमुक्ति सेना, विभिन्न देशका रक्षा सहचारी, निजी क्षेत्रका प्रतिनिधि तथा बेइजिङस्थित नेपाली समुदायको उपस्थिति रहेको थियो ।
