अमेरिकी स्वास्थ्य अधिकारीहरू र ह्वाइट हाउसले अवैध लागुऔषध आपूर्तिमा एउटा नयाँ र अत्यन्तै घातक पदार्थ भेटिएको भन्दै उच्च सतर्कता जारी गरेका छन्।
पशु चिकित्सकहरूले ठूला जनावरलाई बेहोस बनाउन प्रयोग गर्ने ‘मेडेटोमिडाइन’ नामक औषधि अहिले घातक लागुऔषध ‘फेन्टानिल’ सँग मिसाएर बेच्न थालिएको पाइएको हो।
यसलाई सडकमा ‘राइनो ट्रयाङ्क’, ‘मेडे’ वा ‘डेक्स’ नामले चिनिन्छ। अमेरिकी रोग नियन्त्रण तथा रोकथाम केन्द्र (सीडीसी) का अनुसार यसको प्रयोगमा भएको वृद्धि डरलाग्दो छ।
सन् २०२३ मा २४७ नमुनामा मात्र देखिएको मेडेटोमिडाइन सन् २०२४ मा २ हजार ६ सय १६ र सन् २०२५ मा ८ हजार २ सय ३३ नमुनामा भेटिएको छ। यो ३ हजार प्रतिशतभन्दा बढीको वृद्धि हो।
परीक्षण गरिएका ९८ प्रतिशत नमुनाहरूमा यो पदार्थ फेन्टानिलसँगै मिसाइएको पाइएको छ। हालसम्म अमेरिकाका १८ राज्य र वासिङ्टन डीसीका फोहोर पानी र ओभरडोजका घटनाहरूमा यो पदार्थ पुष्टि भइसकेको छ।
पेन्सिलभेनियाका डा. एडम सिओलीका अनुसार, मेडेटोमिडाइन सामान्य टक्सिकोलोजी स्क्रिनिङमा सजिलै पत्ता नलाग्नाले अस्पताल पुऱ्याइएका बिरामीको उपचारमा अन्योल उत्पन्न हुन्छ।
शिकागोमा भएको एउटा घटनामा यसैका कारण १७५ जनाभन्दा बढीमा ओभरडोज देखिएको थियो, जसमा १६ जना अस्पताल भर्ना भएका थिए र एकको मृत्यु भएको थियो।
अधिकारीहरूले लागुऔषध प्रयोगकर्ता र स्वास्थ्यकर्मीहरूलाई यो नयाँ र परिवर्तनशील खतराप्रति सचेत रहन आग्रह गरेका छन्।
