: इरानको कराज सहरलाई राजधानी तेहरानसँग जोड्ने नवनिर्मित ‘बी-१’ पुल मा अमेरिकाले गरेको भीषण आक्रमणपछि इरानी नागरिकहरूमा गहिरो त्रास र आक्रोश देखिएको छ। अमेरिकी राष्ट्रपति डोनाल्ड ट्रम्पले बिहीबार यस आक्रमणको पुष्टि गरेपछि इरानभित्रको वातावरण थप तनावपूर्ण बनेको छ।
इरानमा इन्टरनेटमाथि कडा प्रतिबन्ध लगाइएको भए पनि केही नागरिकहरूले ज्यानको जोखिम मोलेर स्टारलिंक मार्फत विश्व समुदायसँग आफ्नो पीडा पोखेका छन्। इरानमा स्टारलिंक प्रयोग गर्नु गैरकानुनी मानिन्छ र यसबापत दुई वर्षसम्मको जेल सजाय हुन सक्छ। आक्रोशित स्थानीयबासीहरुले बीबीसीसँगको कुराकानीमा आफ्नो देशमाथिको यो प्रकारको हमला कुनै हालतमा पनि सह्य नहुने बताएका छन् ।
तेहरानकी एक २० वर्षीया युवतीले आक्रमणप्रति आक्रोश पोख्दै भनिन्, 'म निकै असहाय महसुस गरिरहेकी छु। ट्रम्पले निर्धक्कसँग हाम्रो पुलमाथि भएको हमलाको पोस्ट गरिरहेका छन्। यो सिलसिला कहाँ पुगेर टुङ्गिने हो, थाहा छैन। कसैले पनि उनको विरुद्ध आवाज किन उठाइरहेका छैनन्रु उनले त हामीलाई पाषाण युगमा फर्काउँदैछन्।'
त्यसैगरी अर्का एक २० वर्षीय युवकले आफ्नो देश दिनप्रतिदिन बर्बाद हुँदै गइरहेकोमा निराशा व्यक्त गरे। 'म आफ्नो देशलाई यसरी ध्वस्त भइरहेको टुलुटुलु हेर्न विवश छु। हामी एउटा बर्बाद राष्ट्र बन्ने दिशामा छौँ,' उनले भने।
आश्चर्यजनक कुरा के छ भने, केही नागरिकले आफूलाई ‘युद्धको समर्थक’ भन्दै गर्दा पनि पुलमाथिको आक्रमणले भने उनीहरूलाई सशंकित तुल्याएको छ। कराजका एक स्थानीय निवासी, जसले आफूलाई युद्ध समर्थकका रूपमा चिनाउँछन्, उनले भने, 'यो पुलले सहरको ट्राफिक समस्या समाधान गर्थ्यो, तर यसलाई नष्ट गरियो। उनीहरूले यसैलाई किन निसाना बनाए भन्ने कुराले मलाई चिन्तित बनाएको छ।'
त्यस्तै, तेहरानकी ४० वर्षीया अर्की महिलाले पनि आफू युद्ध समर्थक भए पनि पुलमाथिको आक्रमणले आश्चर्यमा पारेको बताइन्। तर, उनले यस आक्रमणको पछाडि कुनै खास कारण हुन सक्ने अनुमान समेत गरिन्।
अमेरिकी राष्ट्रपति डोनाल्ड ट्रम्पले बिहीबार इरानको बी-१ ब्रिजमा आक्रमण गरिएको घोषणा गरेका थिए। यो पुल मध्य-पूर्वका अग्ला पुलहरूमध्ये एक मानिन्छ, जसको लम्बाई १,०५० मिटर र पिलरको उचाइ १३६ मिटर रहेको छ।
इरानी सरकारी सञ्चारमाध्यमका अनुसार आक्रमणको समयमा उक्त पुल निर्माणाधीन अवस्थामा थियो र हालसम्म यातायातका लागि खुला गरिएको थिएन। यस आक्रमणमा परी ८ जनाको मृत्यु भएको छ भने अन्य कैयौँ घाइते भएका छन्।
