: अमेरिकी रक्षामन्त्री पीट हेगसेथले आर्मी चीफ अफ स्टाफ जनरल र्यान्डी ए जर्जलाई पदबाट राजीनामा दिन भनेका छन् । ‘अमेरिकी सेनाका ४१ औं चीफ अफ स्टाफ पदबाट उनी तुरुन्त सेवा निवृत्त हुँदै गरेको पेन्टागनका मुख्य प्रवक्ता सीन पार्नेलले सामाजिक सञ्जालमार्फत जानकारी गराएका छन् ।
सामान्यतया आर्मी चीफको कार्यकाल चार वर्षको हुन्छ । रैंडी जर्जले वेस्ट पोइन्ट मिलिट्री एकेडेमीबाट अध्ययन गरेका थिए । उनलाई २०२३ मा पूर्व राष्ट्रपति जो बाइडेनले यस पदमा नियुक्त गरेका थिए । ट्रम्पले राष्ट्रका नाममा सम्बोधन गर्दै इरानसँग अमेरिका–इजरायल युद्ध ‘छिट्टै’ अन्त्य हुने बताए लगतै यस्तो फेरबदलको अवस्था आएको हो ।
जर्जले यसअघि खाडी युद्धमा तथा त्यसपछि इराक र अफगानिस्तानका हालिया द्वन्द्वहरूमा इन्फ्यान्ट्री अफिसरको रूपमा काम गरेका थिए । तर उनलाई किन पद छोड्न भनियो भन्ने कुरा अझै स्पष्ट भएको छैन । सीबीएससँगको कुराकानीमा रक्षा विभागका एक वरिष्ठ अधिकारीले नाम नखुलाउने शर्तमा भने, ‘हामी उहाँको सेवाप्रति आभारी छौं, तर अब सेनामा नेतृत्व परिवर्तनको समय आएको छ ।’
पेन्टागनका प्रवक्ता पार्नेलले भनेका छन्, ‘डिपार्टमेन्ट अफ वार जनरल जर्जको दशकौंको सेवाप्रति आभारी छ । हामी उहाँको सेवा निवृत्तिपछिको जीवनका लागि शुभकामना दिन्छौं ।’ अमेरिकी मिडियाका अनुसार, उनको स्थानमा आर्मी वाइस चीफ अफ स्टाफ जनरल क्रिस्टोफर ला–नेव कार्यवाहक आर्मी चीफ अफ स्टाफ बन्ने छन् । पेन्टागनमा आएपछि हेगसेथले एक दर्जन बढी वरिष्ठ सैन्य अधिकारीहरू हटाइसकेका छन् । जसमा चीफ अफ नेवल अपरेशन्स र एयर फोर्सका वाइस चीफ अफ स्टाफ पनि छन् ।
