: छिमेकी देश पाकिस्तानमा पेट्रोलियम पदार्थको मूल्यमा पुनः भारी वृद्धि भएको छ। बिहीबार र शुक्रबारको मध्यरातदेखि लागू हुने गरी सरकारले पेट्रोल र डिजेलको मूल्यमा अहिलेसम्मकै ठूलो वृद्धि गरेको हो।
बीबीसीका अनुसार बिहीबार राति आयोजित पत्रकार सम्मेलनमा पेट्रोलियम मन्त्री अली परवेज मलिक र अर्थमन्त्री मोहम्मद औरंगजेबले नयाँ मूल्य सूची सार्वजनिक गरेका हुन्। सरकारको पछिल्लो निर्णयअनुसार पेट्रोलमा प्रतिलिटर १३७.२३ रुपैयाँ र डिजेलमा प्रतिलिटर १८४.४९ रुपैयाँ बढाइएको छ।
यस वृद्धिसँगै अब पाकिस्तानमा पेट्रोलको मूल्य प्रति लिटर ४५८.४१ पाकिस्तानी रुपैयाँ र डिजेलको मूल्य प्रति लिटर ५२०.३५ पाकिस्तानी रुपैयाँ पुगेको छ।
भारतीय रुपैयाँको तुलनामा (जहाँ एक भारतीय रुपैयाँ बराबर तीन पाकिस्तानी रुपैयाँ हुन्छ), पाकिस्तानमा पेट्रोल करिब १५२ भारतीय रुपैयाँ प्रति लिटर र डिजेल करिब १७३ भारतीय रुपैयाँ प्रति लिटरमा बिक्री भइरहेको छ।
इरान युद्ध सुरु भएदेखि पाकिस्तान सरकारले पछिल्लो एक महिनामा दोस्रो पटक पेट्रोलियम पदार्थको मूल्य बढाएको हो। यसअघि मार्च ४ मा पनि पेट्रोल र डिजेलको मूल्यमा ५५-५५ रुपैयाँ वृद्धि गरिएको थियो। विश्व बजारमा इन्धनको बढ्दो मूल्य र आन्तरिक आर्थिक संकटका कारण मूल्य वृद्धि गर्नुपरेको पाकिस्तानी अधिकारीहरूले बताएका छन्।
यो वृद्धिसँगै पाकिस्तानमा महँगी अझै बढ्ने अनुमान गरिएको छ, जसले सर्वसाधारणको दैनिकी थप कष्टकर बनाउने देखिन्छ।
