: अफगानिस्तानमा भूकम्पले घर भत्काउँदा एकै परिवारका आठ जनाको ज्यान गएको छ । अफगानिस्तानको काबुल प्रान्तको गोसफन्द दरा क्षेत्रमा एउटा घर भत्किँदा एकै परिवारका आठ जनाको मृत्यु भएको हो ।
करिब दुई वर्षका एक बालक मात्र जीवित रहेको स्वास्थ्य मन्त्रालयका प्रवक्ता शराफत जमानले शनिबार जानकारी दिएका छन् । अफगानिस्तानको विपद् व्यवस्थापन निकायका अनुसार ती बालक घाइते भएका छन् ।
शुक्रबार साँझ ८ः४२ बजे अफगानिस्तानमा ५.८ म्याग्निच्युडको भूकम्प गएको हो । यसको गहिराइ १८६ किलोमिटर रहेको अमेरिकी भूवैज्ञानिक सर्वेक्षणले जनाएको छ । यसको केन्द्रबिन्दु उत्तरपूर्वी बदख्शान प्रान्त रहेको जनाइएके छ । यो राजधानी काबुलबाट करिब २९० किलोमिटर दक्षिण पश्चिममा पर्छ ।
केन्द्रबिन्दु नजिकका क्षेत्रमा तुरुन्तै क्षति वा घाइतेको विवरण प्राप्त भएको छैन । यो प्रान्त दुर्गम भएकाले स्थानीय अधिकारीहरूले जानकारी काबुलसम्म पुर्याउन धेरै घण्टा लाग्न सक्छ । प्रत्यक्षदर्शीहरूले बताए अनुसार काबुलसहित अफगानिस्तानका विभिन्न भाग र भारतको राजधानी नयाँ दिल्लीमा पनि शक्तिशाली कम्पन महसुस गरिएको थियो ।
पाकिस्तानका इस्लामाबाद, पेशावर, चित्राल, स्वात र शाङ्गला क्षेत्रमा पनि भूकम्पको धक्का महसुस गरिएको थियो । त्यहाँ पनि तत्काल क्षति वा घाइतेको विवरण आएको छैन ।
