— यूएईको अबुधाबीस्थित अब्जान क्षेत्रमा इरानी मिसाइललाई निस्तेज बनाउँदा खसेको टुक्राबाट घाइते ६ नेपाली उपचारपछि अस्पतालबाट डिस्चार्ज भएका छन् । गम्भीर अवस्थामा रहेका एक जना पनि खतरामुक्त छन् ।
अबुधाबीस्थित नेपाली दूतावासका अनुसार ६ जना घाइते नेपालीको उपचारपछि डिस्चार्ज गरिएको हो । गम्भीर घाइते एक जनाको भने अस्पतालमै उपचार भइरहेको छ ।
दूतावासले घाइतेहरूसँग टेलिफोनमार्फत सम्पर्क राख्नुका साथै चार जनासँग प्रत्यक्ष भेटेर अवस्थाबारे जानकारी लिएको जनाएको छ । आवश्यक सहयोग र समन्वयका लागि निरन्तर पहल भइरहेको दूतावासको भनाइ छ ।
घाइतेहरूको उपचार संयुक्त अरब इमिरेट्स सरकारको समन्वयमा भइरहेको छ । उपचाररत व्यक्तिको अवस्था सुधार हुँदै गएको र छिट्टै डिस्चार्ज हुन सक्ने सम्भावना रहेको पनि दूतावासले उल्लेख गरेको छ ।
यसैबीच, दूतावासले संयुक्त अरब इमिरेट्समा रहेका नेपालीलाई स्थानीय निकायले जारी गरेका सुरक्षा निर्देशन पालना गर्न आग्रह गरेको छ । आधिकारिक स्रोतबाट आउने सूचनामात्र विश्वास गर्न र सतर्क रहन पनि अनुरोध गरिएको छ ।
इरानबाट आएको मिसाइल र ड्रोनलाई निस्तेज बनाउने क्रममा टुक्राहरू खसेर उक्त घटना भएको थियो ।
यूएईको रक्षा मन्त्रालयका अनुसार शुक्रबार इरानबाट प्रहार गरिएका १८ वटा ब्यालिस्टिक मिसाइल, ४ वटा क्रुज मिसाइल र ४७ वटा ड्रोनलाई निस्तेज बनाइएको थियो । २८ फेब्रुअरीदेखि सुरु भएको युद्धयता यूएईले कुल ४७५ ब्यालिस्टिक मिसाइल, २३ क्रुज मिसाइल र २,०८५ ड्रोनमा अवरोध गरिसकेको जनाएको छ ।
युद्ध सुरु भएयता यूएईमा हालसम्म २०३ जना घाइते भएका छन् । तीमध्ये विभिन्न देशका नागरिक रहेका छन्, जसमा नेपालका नागरिक पनि छन् । यस अवधिमा २ जना सैनिकसहित विभिन्न देशका ८ जनाको ज्यान गइसकेको छ । जसमा एकजना नेपाली समेत परेका छन् ।
