। शनिबार इरानले खाडी क्षेत्रका छिमेकी देशहरूमाथि आक्रमण तीव्र बनाइरहेका बेला अवरोध गरिएका ड्रोनका टुक्रा लागेर बहराइनमा चार जना घाइते भएका छन् ।
बहराइनको आन्तरिक मन्त्रालयले सामाजिक सञ्जाल एक्समा लेखेको छ, ‘इरानी आक्रमणका कारण अवरोध गरिएका ड्रोनका टुक्रा सित्रा क्षेत्रमा खस्दा चार नागरिक सामान्य घाइते भएका छन् र केही घरमा क्षति पुगेको छ ।’ घटनास्थलमा उद्धार तथा एम्बुलेन्स टोली खटिएको पनि मन्त्रालयले जनाएको छ ।
यसैबीच, यूएईको दुबईमा दुई वटा भवनमा पनि हवाई अवरोधपछि खसेका भग्नावशेष लागेका छन् । तीमध्ये एक भवनमा अमेरिकी क्लाउड कम्प्युटिङ कम्पनी ओरेकल कर्पोरेशनको कार्यालय रहेको जनाइएको छ । दुबई प्रशासनले भवनमा आगो लागेको तर मानवीय क्षति नभएको जनाएको छ ।
दुबई मिडिया अफिसले भनेको छ, ‘दुबई इन्टरनेट सिटीस्थित ओराकल भवनको बाहिरी भागमा हवाई अवरोधका क्रममा खसेको भग्नावशेषका कारण सामान्य घटना भएको हो । यसमा कुनै मानवीय क्षति भएको छैन ।’
त्यस्तै, दुबई मरीना क्षेत्रमा रहेको अर्को भवनमा पनि यस्तै भग्नावशेष लागे पनि कुनै मानवीय क्षति नभएको जनाइएको छ ।
यसअघि यसै साता इरानको रिभोल्युसनरी गार्डले खाडी क्षेत्रका अमेरिकी प्रविधि कम्पनीहरूलाई निशाना बनाउन सक्ने चेतावनी दिएको थियो ।
फेब्रुअरी २८ मा अमेरिका–इजरायलको संयुक्त आक्रमणपछि सुरु भएको मध्यपूर्व युद्धयता इरानले खाडी क्षेत्रका देशहरूमाथि आक्रमण गर्दै आएको छ । इरानले सैनिक मात्र नभई ऊर्जा संरचनासहित नागरिक पूर्वाधारलाई पनि लक्षित गरेको आरोप छ ।
शुक्रबार अबुधाबीको हब्सान ग्यास कम्प्लेक्समा ड्रोन वा मिसाइलका टुक्रा खस्दा एक जनाको मृत्यु हुनुका साथै चार जना घाइते भएका थिए । यसैगरी अबुधाबीकै अब्जन क्षेत्रमा पनि यस्तै घटना हुँदा नेपालीहरु समेत घाइते भएका थिए ।
स्ट्रेट अफ होर्मुज खुला गर्न ४८ घण्टे चेतावनी
अमेरिकी राष्ट्रपति डोनाल्ड ट्रम्पले इरानलाई रणनीतिक रूपमा अत्यन्त महत्वपूर्ण स्ट्रेट अफ होर्मुज खुला गर्न ४८ घण्टे चेतावनी दिएका छन् । युद्ध छैटौं सातामा प्रवेश गरिरहेका बेला ट्रम्पको यस्तो अभिव्यक्तिले तनाव थप चर्किएको छ । इरानले भने उक्त चेतावनीलाई ‘असन्तुलित र मूर्खतापूर्ण’ भनेर प्रतिक्रिया दिएको छ ।
शुक्रबार इरानले दुई अमेरिकी लडाकु विमान खसालेको दाबी गरेपछि स्थिति झन् जटिल बनेको छ । इरानी पक्षले ‘शत्रु पाइलट’ फेला पार्न सर्वसाधारणलाई समेत आह्वान गरेको छ । बेपत्ता पाइलटको खोजी दक्षिण–पश्चिमी इरानको पहाडी क्षेत्र कोहगिलुयेह र बोयर–अहमद प्रान्तमा जारी रहेको बताइएको छ ।
सैन्य चेतावनी र प्रतिआक्रमणको धम्की
इरानी संयुक्त सैन्य कमाण्डका जनरल अली अब्दोल्लाही अली आबादीले अमेरिकाले पूर्वाधारमा आक्रमण जारी राखे ‘नरकको ढोका खुल्ने’ भनेर कडा चेतावनी दिएका छन् । उनले मध्यपूर्वमा रहेका अमेरिकी सैन्य संरचनामाथि पनि आक्रमण गर्न सकिने संकेत दिएका छन् ।
फेब्रुअरी २८ मा अमेरिका र इजरायलको संयुक्त आक्रमणबाट सुरु भएको युद्धले हजारौंको ज्यान लिइसकेको छ । यसले विश्व बजार, विशेष गरी तेल आपूर्ति र ढुवानी मार्गमा ठूलो असर पारेको छ ।
इजरायली प्रधानमन्त्री बेन्जामिन नेतन्याहुले महशहरस्थित एक पेट्रोकेमिकल उद्योगमा आक्रमण गरिएको बताएका छन् । उनका अनुसार उक्त संरचनाले इरानको युद्ध खर्च धानिरहेको थियो ।
इरानी सञ्चारमाध्यमका अनुसार उक्त आक्रमणमा ५ जनाको मृत्यु र १७० जना घाइते भएका छन् ।
यसैबीच बुशेर न्युक्लियर प्लान्ट नजिक पनि हवाई आक्रमण भएको इरानले जनाएको छ । सो आक्रमणबाट एक सुरक्षाकर्मीको मृत्यु भएको र भवनमा क्षति पुगेको बताइएको छ । रुसको सरकारी आणविक संस्था रोसाटमले करिब २०० कामदारलाई सुरक्षित स्थानमा सारिएको जनाएको छ ।
कूटनीतिक प्रयास जारी
युद्धबीच कूटनीतिक पहल पनि जारी छ । पाकिस्तानले मध्यस्थताको प्रयास गरिरहेको छ । पाकिस्तानका विदेश मन्त्रालयका प्रवक्ता ताहिर अन्द्राबीले युद्धविरामका प्रयास ‘सही दिशामा अघि बढिरहेको’ बताएका छन् ।
इरानका विदेशमन्त्री अब्बास अरघचीले इस्लामाबादमा वार्ता गर्न आफूहरू तयार रहेको बताएका छन् । पाकिस्तान, टर्की र इजिप्टले संयुक्त रूपमा वार्ताका लागि पहल गरिरहेको जनाइएको छ ।
विमान खसालिएको दाबी र पाइलटको खोजी
यसैबीच इरानले एक अमेरिकी एफ–१५ ई स्ट्राइक ईगल विमान खसालेको दाबी गरेको छ । साथै दुई अमेरिकी हेलिकप्टरमाथि पनि आक्रमण गरिएको जनाएको छ, यद्यपि यसको स्वतन्त्र पुष्टि हुन सकेको छैन ।
अमेरिकी रक्षा मन्त्रालयका अनुसार एक चालक दल सदस्यको उद्धार गरिएको छ भने अर्काको अवस्था अज्ञात छ । अर्को एक अमेरिकी विमान पनि खसेको तर कारण स्पष्ट नभएको बताइएको छ ।
